İngiltərə və Uelsdə Milli Səhiyyə Xidməti (NHS) 1-ci tip diabetin inkişafını gecikdirə bilən ilk dərmanı istifadəyə təqdim edib. Bu dərman Teplizumab adlanır və xəstəliyin simptomlarının yaranmasını orta hesabla təxminən 3 il gecikdirir.
Teplizumab necə təsir göstərir?
Teplizumab immunoterapiya növüdür. O, orqanizmin immun sisteminin mədəaltı vəzdə insulin istehsal edən hüceyrələrə hücumunu yavaşladır. Nəticədə xəstəliyin klinik əlamətlərinin ortaya çıxması və insulin müalicəsinə ehtiyac duyulması gecikir.
Kimlər istifadə edə bilər?
Dərman yalnız xəstəliyin simptomları başlamamışdan əvvəl tətbiq edilir. Bunun üçün:
Qan analizləri vasitəsilə immun sisteminin mədəaltı vəzə hücum etdiyi müəyyən edilməlidir.
Müalicə 8 yaş və daha böyük şəxslərə təyin olunur.
Dərman xəstəxanada damar daxilinə damcı (infuziya) şəklində verilir.
Müalicə kursu ardıcıl 14 gün davam edir.
Niyə bu qədər əhəmiyyətlidir?
1-ci tip diabet zamanı insan ömrü boyu:
qan şəkərini izləməli,
insulin inyeksiyaları və ya insulin pompasından istifadə etməli,
qidalanmasını ciddi nəzarətdə saxlamalıdır.
Mütəxəssislər bildirirlər ki, əlavə 3 il xüsusilə uşaqlar və onların ailələri üçün çox böyük fərq yaradır. Bu müddətdə uşaqlar daha normal həyat sürə, valideynlər isə gündəlik diabet yükündən bir qədər uzaq qalırlar.
Böyük Britaniyada vəziyyət
Hazırda Böyük Britaniyada 1-ci tip diabet üçün ümumi milli skrininq proqramı yoxdur. Buna görə də risk altında olan şəxslər adətən:
ailədə diabet tarixi olduqda,
başqa səbəblərlə aparılan qan analizləri zamanı,
və ya tədqiqat proqramlarında iştirak etdikdə müəyyən edilir.
Qiyməti nə qədərdir?
Teplizumabın rəsmi qiyməti bir müalicə kursu üçün təxminən 150 min funt sterlinqdir. Lakin NHS istehsalçı şirkət olan Sanofi ilə xüsusi endirim razılaşması əldə edib.
Gələcəyə ümid
Mütəxəssislər hesab edirlər ki, Teplizumab 1-ci tip diabetin müalicəsində yeni dövrün başlanğıcıdır. Hazırda bu xəstəlik üçün başqa immunoterapiya preparatları da hazırlanır və gələcəkdə onların kombinasiyası sayəsində bəzi insanların ümumiyyətlə insulinə ehtiyac duymamasına nail olmaq mümkündür.
Mənbə:BBC
Hazırladı:Ziyalə Əhmədli
Gundelik.az
