Rusiyanın Uzaq Şərqində yerləşən balıqçı kəndi Sedankada həyat ağırdır.
Evlərin əksəriyyətində axar su, evdaxili tualet və mərkəzi istilik sistemi kimi əsas şərait yoxdur. Halbuki qış aylarında temperatur mütəmadi olaraq -10°C-yə (14F) qədər enir.
Meşə-tundra və bataqlıqlarla əhatə olunmuş kəndin rayon mərkəzinə maydan oktyabra qədər yalnız çay qayığı və ya tırtıllı nəqliyyat vasitələri ilə getmək mümkündür. Qışda isə ora yalnız qar motosikleti və ya helikopterlə çatmaq olar.
Yerli iş yerləri azdır və kənd sakinlərinin çoxu balıqçılıqla və öz yetişdirdikləri ərzaqla dolanır.
İndi isə yerli sakinlərin sözlərinə görə, 18-55 yaş arası demək olar ki, bütün kişilər Rusiyanın Ukraynadakı müharibəsinə qoşulmaq üçün kəndi tərk edib.
“Odun doğrayacaq heç kim yoxdur”
Təhlükəsizlik səbəbilə adı dəyişdirilmiş kənd sakini Natalya BBC World Service-ə müsahibəsində deyib:
“Bu, ürəkağrıdandır – çoxlu sayda insanımız həlak olub. Bacımın əri və əmioğlanlarım cəbhədədir. Demək olar ki, hər ailədən kimsə döyüşür.”
Kamçatka yarımadasının şimal-qərb kənarında, Oxot dənizi yaxınlığında yerləşən Sedanka Ukraynadakı cəbhə xəttindən 4 300 mildən (7 000 km) çox uzaqdadır.
Okeanın o tayında yerləşən ABŞ-ın Ankoric şəhəri bu məsafənin təxminən yarısı qədər uzaqlıqdadır.
Kəndin 258 nəfərlik əhalisindən 39 kişi müharibəyə getmək üçün Rusiya ilə müqavilə imzalayıb. Onlardan 12-si həlak olub, daha yeddisi isə itkin düşüb.
2024-cü ilin martında regional qubernator kəndə səfər edərkən bir qrup qadın ona belə deyib:
“Bütün kişilərimiz xüsusi hərbi əməliyyata gedib,” – qadınlar Kremlin Ukraynadakı müharibə üçün istifadə etdiyi ifadəni işlədiblər.
“Qış üçün sobalarımızı qızdırmağa odun doğrayacaq heç kim yoxdur,” – bu sözlər dövlət televiziyasında yayımlanan süjetdə yer alıb.
Kamçatka hökumətinin yaydığı birləşdirilmiş fotoda hərbi geyimdə olan Vladimir Akeev və arxa planda xaçlar və güllərlə dolu qəbiristanlıq görünür.
Rusiyanın Uzaq Şərqində yerləşən ucqar Sedanka kəndindən olan Vladimir Akeev Ukrayna müharibəsinə yazıldıqdan dörd ay sonra həlak olub. BBC, Rusiyanın “Medizona” nəşri və könüllü tədqiqatçılar indiyədək 2025-ci ildə həlak olmuş 40 201 rus hərbçisinin ölümünü təsdiqləyib.
Təhlillərimizə əsasən, 2025-ci ildə ümumi ölənlərin sayının 80 000-ə çatacağı ehtimal olunur. Bu isə 24 fevral 2022-ci ildə başlayan genişmiqyaslı işğaldan bəri Rusiya üçün ən ölümcül il ola bilər.
Bu hesablamaya 2025-ci ili ölüm və ya dəfn ili kimi göstərən nekroloqlar daxil edilib, lakin onların hamısı hələ tam işlənməyib və qarşılıqlı yoxlanılmayıb.
2024-cü il üzrə təsdiqlənmiş ölənlərin sayı hazırda 69 362-dir – bu, 2022 və 2023-cü illərin ümumi göstəricisinə təxminən bərabərdir və 2024-cü ilin sonlarından etibarən artım tempi daha da yüksəlib.
Ölümlər rəsmi hesabatlar, vəfatdan sonrakı işlər üzrə rəsmi reyestr (probate məlumat bazası), qəzet məqalələri, qohum və yaxınların sosial şəbəkə paylaşımları, həmçinin yeni xatirə abidələri və məzar məlumatları əsasında təsdiqlənib.
Mənbə: BBC
Hazırladı : Ziyalə Əhmədli
Gundelik.az
