Dəriyə qulluqda əsas məqsəd yalnız onun zahiri görünüşünü yaxşılaşdırmaq deyil, eyni zamanda sağlamlığını qorumaq və təbii bərpa proseslərini dəstəkləməkdir. Xüsusilə genişlənmiş məsamələr, aknedən sonra qalan çapıqlar və qeyri-bərabər dəri teksturası bir çox insanın qarşılaşdığı estetik problemlərdəndir. Bu problemlərin aradan qaldırılması üçün müxtəlif prosedurlara müraciət olunur. Son illərdə maraq doğuran üsullardan biri də Dermapen cihazı ilə həyata keçirilən mikroiynələmə prosedurudur. Dərinin özünü yeniləmə mexanizmini stimullaşdırmağa əsaslanan bu metodun effektivliyi isə dərinin vəziyyətindən, çapıqların növündən, prosedurun düzgün aparılmasından və sonrakı qulluqdan asılıdır.
Kosmetoloq Sabina Qadirova Dermapen prosedurunun xüsusiyyətləri, böyük məsamələrə və akne çapıqlarına təsiri, müalicə kursu və prosedurdan sonrakı qulluq barədə fikirlərini Gundelik.az-la bölüşüb.
Onun sözlərinə görə, hər çapıq növü eyni üsulla müalicə olunmur və bəzi hallarda əlavə prosedurlara ehtiyac yarana bilər:
“Dermapen mikroiynələmə üsulu ilə həyata keçirilən prosedurdur. Bu zaman cihazın xüsusi steril iynələri vasitəsilə dəridə nəzarət olunan mikrokanallar yaradılır. Nəticədə dərinin təbii bərpa mexanizmləri aktivləşir, kollagen sintezinin stimullaşdırılması üçün şərait yaranır. Kollagen dərinin möhkəmliyini və elastikliyini təmin edən əsas zülallardan biridir. Onun yenilənmə prosesində iştirakı zamanla dəri səthinin daha hamar görünməsinə və teksturanın yaxşılaşmasına kömək edə bilər. Dermapen prosedurunun əsas tətbiq sahələrindən biri akne nəticəsində yaranan çökək çapıqların görünüşünü azaltmaqdır. Xüsusilə dəridə nahamarlıq və çökəkliklərlə müşayiət olunan çapıqlarda müsbət dəyişikliklər müşahidə edilə bilər. Bununla belə, nəticə çapıqların dərinliyindən, formasından və dərinin fərdi xüsusiyyətlərindən asılıdır. Hər çapıq növü eyni üsulla müalicə olunmur və bəzi hallarda əlavə prosedurlara ehtiyac yarana bilər”.
Həmsöhbətim bildirir ki, böyük məsamələrlə bağlı da bir məqamı nəzərə almaq lazımdır.
“Məsamələri tamamilə yox etmək mümkün deyil. Onların görünüşünü azaltmaq və dəri səthini daha hamar göstərmək mümkündür. Dermapen kollagen sintezini stimullaşdırmaqla dəri teksturasının yaxşılaşmasına kömək edə bilər. Lakin məsamələrin nəzərəçarpacaq dərəcədə görünməsinin səbəbi yağ ifrazının çoxluğu, genetik xüsusiyyətlər, günəş zədələnməsi və dərinin elastikliyinin azalması da ola bilər. Buna görə prosedurun nəticələri hər kəsdə eyni olmur. Müalicə kursu fərdi şəkildə planlaşdırılmalıdır. Seansların sayı və aralarındakı müddət dərinin vəziyyətinə, çapıqların dərinliyinə və əvvəlki prosedurlara verilən reaksiyaya uyğun müəyyən edilir. Akne çapıqlarında çox vaxt bir neçə seans tələb olunur. Dəyişikliklər dərhal deyil, dərinin bərpa və kollagen yenilənməsi prosesi davam etdikcə tədricən meydana çıxır. Bir seansdan sonra dərinin görünüşündə müvəqqəti parlaqlıq və hamarlıq hiss oluna bilər, lakin çapıqların korreksiyası üçün daha uzun müddət lazım ola bilər. İynə dərinliyi prosedurun effektivliyinə və təhlükəsizliyinə təsir edən əsas amillərdəndir. Dərinlik dəri sahəsinə, çapıqların xüsusiyyətlərinə və müalicənin məqsədinə uyğun seçilməlidir. Üzün müxtəlif nahiyələrində dərinin qalınlığı eyni olmadığı üçün bütün sahələrdə eyni parametrdən istifadə etmək düzgün yanaşma deyil. Daha dərin iynələmə mütləq daha yaxşı nəticə demək deyil. Əksinə, uyğun olmayan dərinlik dəridə əlavə qıcıqlanma, uzunmüddətli qızartı, piqmentasiya və çapıqlaşma riskini artıra bilər. Buna görə prosedur steril şəraitdə, müvafiq təlimə malik mütəxəssis tərəfindən və fərdi qiymətləndirmə əsasında aparılmalıdır”, deyə o, vurğulayıb.
Mütəxəssis bildirir ki, izotretinoin kimi akne müalicəsində istifadə edilən dərmanları qəbul edən və ya yaxın zamanda qəbul etmiş şəxslər də prosedurdan əvvəl mütləq həkimlə məsləhətləşməlidirlər.
“Aktiv akne zamanı xüsusi diqqət tələb olunur. Dəridə ağrılı, irinli və dərin iltihablı səpkilər varsa, Dermapen proseduruna tələsmək olmaz. Belə hallarda mikroiynələmə iltihabın yayılması və əlavə fəsadlar riskini artıra bilər. Əvvəlcə akne nəzarət altına alınmalı, daha sonra çapıqların müalicəsi planlaşdırılmalıdır. Həmçinin dəri infeksiyaları, aktiv herpes, sağalma problemləri və keloid əmələgəlməsinə meyillilik kimi hallar prosedurun uyğunluğunun həkim tərəfindən qiymətləndirilməsini tələb edir. İzotretinoin kimi akne müalicəsində istifadə edilən dərmanları qəbul edən və ya yaxın zamanda qəbul etmiş şəxslər də prosedurdan əvvəl mütləq həkimlə məsləhətləşməlidirlər. Prosedurdan sonrakı qulluq nəticələrin qorunması və fəsadların qarşısının alınması baxımından mühüm əhəmiyyət daşıyır. İlk günlərdə dəridə qızartı, həssaslıq, yüngül şişkinlik və quruluq yarana bilər. Bu dövrdə dəriyə yumşaq yanaşmaq, onu qıcıqlandıran vasitələrdən uzaq durmaq və mütəxəssisin tövsiyələrinə əməl etmək lazımdır. Dərinin bərpa mərhələsində güclü turşular, retinoidlər, skrablar və digər aktiv tərkibli məhsulların istifadəsinə yalnız uyğun vaxtda, mütəxəssisin göstərişi ilə qayıtmaq məsləhətdir.
Günəşdən qorunma da vacib şərtlərdən biridir. Dəri həssas olduğu üçün geniş spektrli, ən azı SPF 30 qoruyucudan istifadə etmək, birbaşa günəş şüalarından və solyariydən uzaq durmaq lazımdır. Makiyajın istifadəsinə isə dərinin vəziyyətinə və mütəxəssisin tövsiyəsinə uyğun olaraq yenidən başlamaq daha doğrudur. Ev şəraitində özbaşına mikroiynələmə aparmaq və steril olmayan cihazlardan istifadə etmək infeksiya və dəri zədələnməsi riskini artırır. Mənim fikrimcə, Dermapen proseduruna möcüzəvi və bütün dəri problemlərini aradan qaldıran üsul kimi yanaşmaq düzgün deyil. Bu, uyğun pasiyentlərdə dəri teksturasının yaxşılaşdırılması və akne çapıqlarının görünüşünün azaldılması üçün faydalı vasitələrdən biri ola bilər. Lakin uğurlu nəticə üçün ilk növbədə problemin səbəbi düzgün müəyyənləşdirilməli, aktiv akne nəzarətə alınmalı, uyğun müalicə planı hazırlanmalı və prosedurdan sonrakı qulluq qaydalarına əməl edilməlidir. Ən vacib məqam odur ki, hər kəsin dərisi fərqlidir. Bir insanda yaxşı nəticə verən prosedur digər şəxsdə eyni effekti yaratmaya bilər. Buna görə Dermapenə başlamazdan əvvəl dəri vəziyyətinin peşəkar qiymətləndirilməsi, risklərin nəzərə alınması və real gözləntilərin müəyyənləşdirilməsi vacibdir. Məqsəd dərini qısa müddətdə dəyişdirmək deyil, onun sağlamlığını qoruyaraq daha hamar və bərabər görünüş əldə etməkdir”, – deyə S.Qadirova qeyd edib.
Nurəddin Abdullayev
Gundelik.az
