Fransada quraqlıq və güclü istilər səbəbindən şərab istehsalının son 100 ilin ən aşağı səviyyəsinə düşəcəyi gözlənilir.
Gundelik.az-ın məlumatına görə, bu barədə ölkənin Kənd Təsərrüfatı Nazirliyinin məlumatlarına istinadən “İnterfaks” xəbər verir.
Bu il Fransada 34,9 milyon hektolitr şərab istehsal olunacağı gözlənilir. Halbuki bir ay əvvəl proqnoz 33,9 milyon hektolitr təşkil edirdi. Bununla belə, istehsal ötən illə müqayisədə 2 faiz, 2021–2025-ci illərin orta göstəricisi ilə müqayisədə isə 14 faiz aşağı olacaq.
Nazirlikdən bildirilib ki, azalma həm üzüm bağlarının sahəsinin kiçilməsi, həm də quraqlıq və yay aylarında müşahidə olunan güclü istilər nəticəsində məhsuldarlığın aşağı düşməsi ilə əlaqədardır. Bununla yanaşı, müxtəlif şərabçılıq bölgələrində vəziyyət fərqlidir: bəzi ərazilərdə ciddi itkilər qeydə alınarkən, digərlərində məhsuldarlıq ötən ilin göstəricilərini üstələyib.
Proqnozun yüksəldilməsinə ölkənin ən böyük şərabçılıq bölgəsi olan Lanqedok-Russilyonda gözləniləndən daha yüksək üzüm məhsuldarlığı səbəb olub. Yayın sonunda burada yağıntılar düşüb. Ekspertlər bölgədə istehsalın 10,585 milyon hektolitrə çatacağını gözləyirlər ki, bu da ötən illə müqayisədə 20 faiz, son beş ilin orta göstəricisi ilə müqayisədə isə 2 faiz çoxdur.
Yaz aylarında hava şəraiti əlverişli olub və müsbət proqnozların formalaşmasına şərait yaradıb. Lakin yaydakı quraqlıq üzüm tənəklərinə zərər vuraraq məhsuldarlığı azaldıb. 2024 və 2025-ci illərdə də Fransada şərab istehsalı tarixi göstəricilərlə müqayisədə aşağı səviyyədə olub.
Bu yay Fransada müşahidə olunan anomal isti hava 40 ildən artıq müddətə aid rekordları yeniləyib. İstinin, eləcə də meşə yanğınlarının nəticələrinin ölkə iqtisadiyyatına vurduğu zərərin avqustun əvvəlində artıq 3–6 milyard avro həcmində qiymətləndirildiyi bildirilirdi.
Bütün bunlar hökumətin büdcə kəsirini ÜDM-in 5,1 faizindən 5 faizə endirmək planının həyata keçirilməsini də əhəmiyyətli dərəcədə çətinləşdirə bilər.
Nurəddin Abdullayev
Gundelik.az
