Fransa hökuməti hazırda ibtidai və orta məktəblərdə qüvvədə olan mobil telefon istifadəsi qadağasını yeni tədris ilindən etibarən liseylərdə də tətbiq etməyə hazırlaşır.
Fransanın təhsil naziri Edouard Geffray France Info kanalına müsahibəsində gənclərin sosial mediadan istifadəsi və məktəblərdə tətbiq olunan qaydalar barədə danışıb.
Nazir bildirib ki, ilin əvvəlindən gündəmdə olan və parlamentin iki palatası – Senat və Milli Assambleya arasında müzakirə edilən 15 yaşdan aşağı şəxslərin sosial media istifadəsini tənzimləyən qanunun yekun variantının bu yay təsdiqlənəcəyini gözləyir.
Geffray həmçinin qeyd edib ki, 2018-ci ildən ibtidai və orta məktəblərdə qüvvədə olan mobil telefon qadağasının yeni tədris ilindən etibarən liseylərdə də tətbiq olunması planlaşdırılır.
“Bunun şagirdlərimiz üçün son dərəcə vacib olduğunu düşünürəm”, – deyə nazir vurğulayıb.
Sosial media istifadəsinə yaş məhdudiyyəti
Fransada 15 yaşdan aşağı şəxslərin sosial media istifadəsinə dair qanun layihəsi yanvar ayında Milli Assambleyada, aprel ayında isə Senatda təsdiqlənib. Lakin hər iki qurumun qəbul etdiyi mətnlər arasında müəyyən fərqlər mövcuddur.
Fransa qanunvericiliyinə əsasən, hər hansı qanunun qəbul olunması üçün Senat və Milli Assambleya eyni mətn üzərində razılığa gəlməlidir.
Son dövrlərdə azyaşlıların sosial mediadan istifadəsi Avropa ölkələrinin əsas müzakirə mövzularından birinə çevrilib. Böyük Britaniyanın Baş naziri Keir Starmer iyunun 15-də açıqlayıb ki, 16 yaşdan aşağı şəxslərin sosial media istifadəsini məhdudlaşdıran qaydalar gələn ilin əvvəlindən qüvvəyə minəcək.
Avstraliyada isə 2025-ci ilin dekabr ayında 16 yaşdan aşağı gənclərin sosial media platformalarına girişini məhdudlaşdıran qanun tətbiq olunub.
Mənbə:TRT Haber
Hazırladı:Ziyalə Əhmədli
Gundelik.az
