Finlandiya hakimiyyəti vətəndaşlıq üçün müraciət edənlər üçün yeni tələbləri təsdiqləyib və onlardan ölkənin tarixi, mədəniyyəti və qanunları üzrə hərtərəfli imtahan vermələrini tələb edir.
Gundelik.az xəbər verir ki, bu barədə Finlandiya Miqrasiya Xidməti məlumat yayıb.
Bildirilib ki, vətəndaşlıq qanunvericiliyinə edilən dəyişikliklər 2027-ci il yanvarın 1-dən qüvvəyə minəcək və keçid dövrü fevralın sonuna qədər davam edəcək. Yeni tələb 2027-ci il martın 1-dən etibarən sənədlərini onlayn və ya miqrasiya xidməti ofisinə təqdim edən 18-64 yaş arası bütün ərizəçilər üçün məcburi olacaq. Ciddi xəstəlikləri və ya əlilliyi olan şəxslər, eləcə də Finlandiya məktəblərinin və universitetlərinin fin və ya isveç dilində təhsil almış məzunları imtahandan azad ediləcəklər.
İmtahan fin və ya isveç dillərində kompüter əsaslı çoxvariantlı test olacaq. Test üçün ödəniş tələb olunacaq və nəticələrin müddəti bitməyəcək.
