Aprel ayının sonuna aid verilənlərə görə, Yer üzündə ən yüksək temperaturun qeydə alındığı 50 şəhərin hamısı Hindistanda yerləşib. Mütəxəssislər bu vəziyyətin müasir tarixdə bənzərinin olmadığını bildirirlər.
Dünya üzrə hava keyfiyyəti və iqlim göstəricilərini izləyən AQI platformasının hesabatına əsasən, aprelin son günlərində qlobal miqyasda nadir rast gəlinən bir hadisə baş verib. Planetin ən isti 50 yaşayış məntəqəsinin hamısı istisnasız olaraq Hindistan ərazisində qeydə alınıb.
Normalda ilin ən isti dövrü olmayan aprel ayında Hindistanda orta maksimum temperatur 44,7°C-ə qədər yüksəlib. Siyahının zirvəsində isə Uttar Pradeş ştatında yerləşən Banda şəhəri dayanıb — burada termometrlər 46,2°C göstərib və həmin gün dünyada ölçülən ən yüksək temperatur kimi tarixə düşüb.
İstilik həyatda qalma həddini keçə bilər
İqlim alimləri və tarixçilər bildirirlər ki, Hindistanın daxili bölgələrində cəmləşən bu ekstremal isti dalğası aprel ayı üçün yüzlərlə rekordun qırılmasına səbəb olub. Qlobal iqlim böhranının nəticəsi kimi Hindistanda yay mövsümünün hər il daha erkən başladığı və daha şiddətli keçdiyi qeyd edilir. Mütəxəssislər 2050-ci ilə qədər temperaturun sağlam insanlar üçün belə “həyatda qalma həddini” aşa biləcəyi barədə xəbərdarlıq edirlər.
Xüsusilə yaşlılar, uşaqlar və açıq havada işləyən işçilər üçün bu vəziyyət həyati risk yaradır. Eyni zamanda ölkənin kənd təsərrüfatı istehsalı və səhiyyə sistemi üzərində də böyük təzyiq formalaşdırır.
İstiliyin artması ilə paralel olaraq Hindistan bu il enerji böhranı ilə də üzləşib. Yaxın Şərqdəki müharibənin neft təchizatını məhdudlaşdırması, soyutma tələbatının pik həddə çatdığı bir dövrdə ölkəni yanacaq çatışmazlığı ilə üz-üzə qoyub.
El Nino hava hadisəsinin təsiri ilə musson yağışlarının normadan aşağı olacağı gözlənilir. Rütubətlə birləşən hiss edilən temperaturun mərkəzi və şərq ştatlarda 50–60°C kimi təhlükəli səviyyələrə çata biləcəyi proqnozlaşdırılır.
Mənbə:TRT Haber
Hazırladı:Ziyalə Əhmədli
Gundelik.az
