İsti yay günündə dondurmanı çox sürətlə yeyəndə qəfil alnınızda və ya başınızın içində kəskin ağrı hiss edə bilərsiniz. Buna “brain freeze” (beyin donması) və ya dondurma baş ağrısı deyilir.
Nevroloq Amaal Starling bildirir ki, bu hal çox yayğındır və adətən zərərsizdir.
Niyə baş verir?
Alimlərin fikrincə, çox soyuq qida və ya içkilər damağın və boğazın arxa hissəsinin sürətlə soyumasına səbəb olur. Nəticədə həmin nahiyədəki qan damarları əvvəlcə daralır, sonra isə qan axınını bərpa etmək üçün sürətlə genişlənir.
Bu dəyişikliklər üz siniri və alın nahiyəsində ağrını hiss edən trigeminal siniri qıcıqlandırır. Buna görə də ağrı ağızda deyil, başda və ya alında hiss olunur.
Qarşısını necə almaq olar?
Dondurmanı və ya soyuq içkiləri tələsmədən qəbul edin.
Qurtumlar və ya tikələr arasında qısa fasilələr verin.
Ağrı başlayarsa, dilinizi damağınıza toxunduraraq həmin nahiyəni isidin.
İlıq içki içmək də kömək edə bilər.
Maraqlı əlaqə
Araşdırmalar göstərir ki:
Dondurma baş ağrısı ailələrdə irsi şəkildə daha çox rast gəlinə bilər.
Miqreni olan insanlarda bu ağrılar adətən daha güclü olur.
Bir araşdırmada miqren xəstələrinin 93%-i dondurma baş ağrısı yaşadıqlarını bildirib.
İtaliyalı professor Irene Toldo qeyd edir ki, tez-tez və ya çox şiddətli “brain freeze” yaşayan insanların miqren və digər baş ağrılarını da nəzərdən keçirmələri faydalı ola bilər.
Elmi araşdırmalarda istifadəsi
1960-cı illərdən bəri alimlər miqreni öyrənmək üçün qəsdən insanlarda “brain freeze” yaradıblar. Çünki bu ağrılar miqren zamanı iştirak edən eyni siniri – trigeminal siniri – aktivləşdirir və miqrenin mexanizmlərini araşdırmağa kömək edir.
Mənbə:BBC
Hazırladı:Ziyalə Əhmədli
Gundelik.az
