Çin hökuməti tərəfindən qadağan edilmiş Çin rəqs və musiqi qrupunun Avstraliya turnesi ölkənin baş naziri Entoni Albanizin evinə qarşı bomba hədəsi ilə nəticələnib.
Yerli mediada yayımlanan e-poçt məktublarında Şen Yun (Shen Yun) qrupunun ifaçılarına qarşıdakı Avstraliya şoularını ləğv etməsələr, paytaxt Kanberradakı baş nazirin rəsmi iqamətgahında partlayış törədiləcəyi ilə hədələndikləri bildirilib.
Bu iddialar ilk dəfə Çində qadağan edilmiş və Shen Yun ilə əlaqəli olan Falun Qonq dini hərəkatına yaxın bir qəzetdə dərc edilib.
Rəsmilər məktubların məzmunu ilə bağlı şərh verməkdən imtina edərək yalnız çərşənbə axşamı baş nazirin evində “ehtimal olunan təhlükəsizlik insidenti”nə müdaxilə etdiklərini və “şübhəli heç nə tapılmadığını” təsdiqləyiblər.
Polisin məlumatına görə, Albaniz yerli vaxtla saat 18:00-da (07:00 GMT) evindən təxliyə edilib və bir neçə saat başqa bir yerə aparılıb.
Çin dilində yazılmış məktublardan birində Kanberradakı baş nazir iqamətgahı olan Lodge ətrafına böyük miqdarda nitroqliserin partlayıcı maddə yerləşdirildiyi iddia olunub. Məktubda deyilir:
“Əgər çıxışı davam etdirməkdə israr etsəniz, baş nazirin iqamətgahı xarabalığa çevriləcək və qan çay kimi axacaq.”
Avstraliya Yayım Korporasiyasının (ABC) məlumatına görə, bu hədə barədə Shen Yun çərşənbə axşamı polisi məlumatlandırıb. BBC qrupdan şərh almaq üçün əlaqə saxlayıb.
Avstraliya Federal Polisi isə məktublarla bağlı şərh verməkdən imtina edib.
Albaniz çərşənbə günü səhər sosial şəbəkədə polisin işinə və ona dəstək mesajları göndərənlərə təşəkkür edib, qapını qoruyan itinin fotosunu paylaşıb və “Toto ayıqdır, amma hər şey qaydasındadır” yazıb.
Çərşənbə günü keçirilən tədbirdə etirazçılar tərəfindən çıxışı kəsilən Albaniz ölkədə siyasi debatların tonunu azaltmaq çağırışını bir daha təkrarlayıb:
“Bu, insanlara hər fürsətdə gərginliyi azaltmağı demək üçün bir xatırlatmadır. Bu cür məsələləri adi hal kimi qəbul edə bilmərik.”
Mənbə: BBC
Hazırladı: Ziyalə Əhmədli
Gundelik.az
