Britaniyanın daxili təhlükəsizlik xidməti olan MI5 xəbərdarlıq edib ki, Çin casusları işə qəbul agenti kimi davranaraq Böyük Britaniyanın dövlət qurumlarında və orduda çalışan şəxsləri dövlət sirlərini açıqlamağa sövq etməyə çalışırlar.
Böyük Britaniya, ABŞ, Avstraliya, Kanada və Yeni Zelandiyanın kəşfiyyat qurumlarından ibarət olan Beş Göz (Five Eyes) alyansının yaydığı birgə bülletendə bildirilir ki, gizli agentlər LinkedIn, Indeed və Upwork kimi qanuni platformalarda saxta analitik vakansiyaları yerləşdirirlər.
Müraciət edən şəxslər daha sonra Çin hərbi kəşfiyyatının istifadə edə biləcəyi, ictimaiyyətə açıq olmayan məlumatları paylaşmağa məcbur edilirlər.
Beş Göz alyansı bildirir ki, Çin casusları Pekinə strateji və taktiki üstünlük qazandıra biləcək hərbi, siyasi və iqtisadi xarakterli məxfi məlumatları əldə etməyə çalışırlar.
Çinin Böyük Britaniyadakı səfirliyinin nümayəndəsi isə ittihamları rədd edərək onları “tamamilə yalan” və “qərəzli böhtan” adlandırıb.
Səfirliyin açıqlamasında deyilir:
“Beş Göz alyansı dünyanın ən böyük kəşfiyyat təşkilatıdır və onun üzvləri dünya üzrə açıq şəkildə casusluq fəaliyyəti həyata keçirirlər. Sülhsevər ölkələr üçün əsl təhlükə məhz onlardır.”
Xəbərdarlıqda qeyd olunur ki, hədəf seçilən şəxslər arasında təhlükəsizlik icazəsinə malik əməkdaşlar, akademiklər və analitik mərkəzlərdə çalışan mütəxəssislər də var.
Böyük Britaniyanın Təhlükəsizlik Naziri Dan Jarvis bildirib:
“Bütün dövlət və hərbi qulluqçuları Milli Qoruyucu Təhlükəsizlik İdarəsinin tövsiyələrinə əməl etməyə, internet üzərindən həyata keçirilən hədəfləmə cəhdlərini tanımağa və bilmədən ölkənin təhlükəsizliyini riskə atmamağa çağırıram.”
Nazirin sözlərinə görə, hökumət ölkəni qorumaq üçün qəti addımlar atıb və Çin də daxil olmaqla müxtəlif dövlətlərin düşmən fəaliyyətlərinə qarşı mübarizəni davam etdirəcək.
Bülletendə izah olunur ki, Çin agentləri əvvəlcə internetdə saxta iş elanları yerləşdirir, sonra isə müraciət edənlərin CV-lərini araşdıraraq istifadə edə biləcəkləri namizədləri seçirlər.
Daha sonra onlarla onlayn müsahibələr keçirilir və onların hökumət əlaqələri, hərbi fəaliyyətlər və digər həssas sahələrə çıxış imkanları müəyyənləşdirilir.
Son mərhələdə isə namizədlərdən Çinin beynəlxalq münasibətləri və ya müdafiə məsələləri kimi mövzular üzrə sınaq hesabatları hazırlamaları istənilir.
Bu hesabatların hər biri üçün onlara ödəniş platformaları vasitəsilə min dollara qədər pul təklif oluna bilər.
Keçən ilin noyabrında Dan Jarvis bildirmişdi ki, MI5 Çin Dövlət Təhlükəsizliyi Nazirliyi adından istifadə olunan iki LinkedIn profilini müəyyən edib. Həmin profillər Amanda Qiu və Shirly Shen adları ilə fəaliyyət göstərirdi.
Mühafizəkar deputat Neil O’Brien-in tədqiqatçısı Simon Whelband deyib ki, həmin hesablardan biri onunla əlaqə saxlayıb.
Onun sözlərinə görə, göndərilən mesaj zəif ingilis dilində yazılmışdı və iş təklifi ehtiva edirdi.
Neil O’Brien isə BBC-yə bildirib:
“Əgər daha təcrübəsiz birisinizsə, nəyin baş verdiyini anlamaya bilərsiniz. Sizə LinkedIn üzərindən gələn təklifin həqiqi iş imkanı olduğunu düşünə bilərsiniz.”
Ötən il hökumət tərəfindən istifadə olunan şifrələnmiş rabitə texnologiyalarının yenilənməsinə 170 milyon funt sterlinq ayrılıb və Çin mənşəli kiberhücumlara qarşı əlavə müdafiə tədbirləri tətbiq olunub.
2025-ci ilin sentyabrında isə Çin adına casusluqda ittiham olunan iki nəfərlə bağlı məhkəmə işi başlamasına bir həftə qalmış dayandırılıb.
Prokurorluq bildirib ki, hökumətdən Çini milli təhlükəsizlik təhdidi kimi xarakterizə edən bəzi sübutları əldə etmək mümkün olmadığından iş davam etdirilməyib.
Mənbə:BBC
Hazırladı:Ziyalə Əhmədli
Gundelik.az
