Rəcəb Tayyib Ərdoğan Nazirlər Kabinetinin iclasından sonra xalqa müraciət edib. O bildirib ki, bölgədəki bütün qeyri-sabitliyə baxmayaraq, Türkiyə sabitliyini qoruyaraq regionun ən güclü və dayanıqlı ölkələrindən birinə çevrilib.
Ərdoğan çıxışının əvvəlində Tekirdağın Çorlu rayonunda baş verən asayiş hadisəsinə müdaxilə zamanı şəhid olan polis əməkdaşları Erkan Tütüncülər və Emrah Koçun ailələrinə başsağlığı verib. O, həmçinin Mersinin Tarsus rayonunda silahlı hücum nəticəsində həyatını itirən 6 nəfərə Allahdan rəhmət, yaralananlara isə şəfa diləyib.
Prezident bildirib ki, kabinet toplantısında:
“Terrorsuz Türkiyə” prosesi,
beynəlxalq təhlükəsizlik,
İraq, Somali və Qara dənizdəki son vəziyyət,
həmçinin ədliyyə gündəmi müzakirə olunub.
O qeyd edib ki, 28 fevralda İrana edilən hücumlarla başlayan böhranın təsirləri hələ də davam edir.
“Dünya çoxqatlı böhran yaşayır”
Ərdoğan bildirib ki, dünya hazırda ciddi iqtisadi və siyasi qeyri-müəyyənlik dövründən keçir.
Onun sözlərinə görə:
yanacaq qiymətlərində balans tam bərpa olunmayıb,
bir çox ölkədə inflyasiya yüksəlir,
tədarük zəncirlərindəki problemlər hələ həll olunmayıb, Hörmüz boğazındakı gərginlik qlobal iqtisadiyyata təsir göstərir.
O deyib:
“Dünyanı sunami kimi vuran bu şok dalğasının yaratdığı dağıntının miqyası hələ tam bilinmir.”
Ərdoğan əlavə edib ki, bəzi böyük maliyyə dairələri və “vəhşi kapitalistlər” böhranlardan istifadə edərək daha da zənginləşirlər, halbuki orta və aşağı gəlirli insanların vəziyyəti getdikcə ağırlaşır.
Onun fikrincə, xüsusilə İran ətrafında başlayan müharibə qlobal iqtisadi rifah üçün ciddi dağıdıcı nəticələr yaradıb.
Mənbə:TRT Haber
Hazırladı:Ziyalə Əhmədli
Gundelik.az
