Fransanın tac daş-qaşlarının oğurlanması ilə nəticələnən sensasiyalı hadisədən sonra yenidən ziyarətçilərə açılan Luvr Muzeyi indi sənət əsərləri ilə deyil, sındırılmış pəncərəsi ilə diqqət mərkəzinə çevrilib.
Gundelik.az xəbər verir ki, Parisdə Sena çayı üzərində gəzinti gəmilərində bələdçilər turistlərə artıq Luvrun kolleksiyalarından deyil, “Fransa tacını oğruların sındırdığı pəncərə”ni göstərirlər. Dünyanın ən çox ziyarət edilən muzeyi bazar günü səhər dörd nəfərlik dəstənin Apollon qalereyasına daxil olaraq 88 milyon avro dəyərində qiymətli daş-qaşları oğurlaması ilə açılıb.
Hadisədən üç gün sonra muzey yenidən fəaliyyətə başlasa da, Cour Napoléon həyətində və şüşə piramida girişində uzun növbələr əmələ gəlib. Ziyarətçilər içəridəki 33 min sənət əsərinə baxmaqdan çox, oğruların sındırdığı pəncərəni görmək üçün muzeyin xaricində toplaşırlar.
Quai François Mitterand küçəsində qismən qara pərdələrlə örtülmüş pəncərədən baxaraq şəkil çəkdirməyə çalışan turistlər izdiham yaradıb. Hollandiya sakini Alida deyib: “Əgər bu hadisə bir film olsaydı, bəlkə də çox darıxdırıcı görünərdi. Amma hər şey inanılmaz dərəcədə sadə baş verib.”
Dörd dəqiqəyə tamamlanan peşəkar plan
Məlumata görə, iş jiletləri geyinmiş iki oğru küçədə dayanmış yük liftinin pəncərəsindən muzeyə daxil olub. Onlar şüşəni sındıraraq iki vitrini spiral daş kəsicilərlə qırıb, içərisindəki qızıl-zinət əşyalarını götürüblər. Daha sonra oğrular gözləyən iki motosikletə minərək hadisə yerindən uzaqlaşıblar.
Oğurlanan səkkiz əşya arasında Napoleonun ikinci arvadı Mari Luizə hədiyyə etdiyi zümrüd və brilyant boyunbağı, eləcə də İmperator Yevgeniyaya məxsus brilyant tac da olub.
Limoges şəhərindən gələn ziyarətçi Fanny deyib: “Luvr – Mona Lizanın evidir. İnsan burada təhlükəsizliyin ən yüksək səviyyədə olduğunu düşünür, amma belə deyilmiş.” Onun əri Vinsent isə əməliyyatın dəqiqliyinə diqqət çəkərək bildirib: “Yüzlərlə pəncərə var, amma onlar məhz doğru pəncərəni tapıblar. Cəmi dörd dəqiqəyə girib çıxdılar – peşəkar idilər.”
Təhlükəsizlik boşluqları və istintaq
Fransanın daxili işlər naziri Lorent Nüñez istintaqın sürətlə davam etdiyini, işə 100-dən çox müstəntiqin cəlb olunduğunu bildirib. Bununla belə, muzeydə büdcə kəsiri, işçi çatışmazlığı və təhlükəsizlik sistemində boşluqların yaranması ilə bağlı iddialar gündəmə gəlib.
Prezident Emmanuel Makron Luvrun təhlükəsizlik tədbirlərinin gücləndirilməsi üçün təcili addımların atılmasını tapşırıb. Muzeyin direktoru bu məsələ ilə bağlı yaxın günlərdə Senatda ifadə verəcək.
Hazırda Apollon Qalereyası bağlı qalır. Giriş üç boz panellə örtülüb, muzey işçiləri isə ziyarətçilərə həmin dəhlizdə dayanmamağı tapşırırlar.
Gundelik.az
