Müasir şəhərlər yalnız memarlıq nümunələri ilə deyil, onların insan həyatına verdiyi dəyərlə ölçülür. Tikinti sektoru iqtisadiyyatın aparıcı sahələrindən biri olsa da, onun əsl mahiyyəti kvadratmetrlərdən, mərtəbələrdən və beton konstruksiyalardan daha geniş məna daşıyır. Çünki hər tikilən bina gələcəyin ailələrinə ev, uşaqlara xatirə, şəhərə isə yeni bir sima bəxş edir. Məhz buna görə bu sahədə çalışan hər bir peşəkarın üzərinə təkcə texniki deyil, həm də sosial və mənəvi məsuliyyət düşür.
Son illər Azərbaycanda şəhərsalma və tikinti sahəsində həyata keçirilən müasir layihələr, təhlükəsizlik standartlarının yüksəldilməsi, estetik memarlığın inkişafı və dayanıqlı şəhər mühitinin formalaşdırılması bu sahəyə yeni baxışın yaranmasına səbəb olub. Artıq tikinti dedikdə yalnız bina inşa etmək deyil, insanın rahat, təhlükəsiz və keyfiyyətli yaşayış mühiti yaratmaq anlayışı ön plana çıxır.
Gundelik.az-ın müsahibi tikinti sahəsi üzrə mütəxəssis tikinti sektorunun bu günü və sabahı, keyfiyyət, peşəkar kadr hazırlığı, təhlükəsizlik standartları, memarlıq estetikası və insan amilinin tikinti layihələrində oynadığı rol barədə fikirlərini bölüşüb.
Tikinti sadəcə bina ucaltmaqdır, yoxsa gələcəyi formalaşdırmaq məsuliyyəti?
– Qətiyyən sadəcə bina ucaltmaq deyil. Daşı daş üstünə qoyub divar çəkmək işin ən asan tərəfidir. Əsl tikinti insanların illərlə yaşayacağı, xatirələr yaradacağı, övlad böyüdəcəyi bir mühit formalaşdırmaqdır. Biz bu gün necə binalar tikiriksə, 30–50 il sonra şəhərlərin siması, insanların gündəlik həyatı və yaşam tərzi də məhz həmin qərarların nəticəsi olacaq. Buna görə də hər layihəyə yalnız biznes kimi deyil, gələcək nəsillərə qoyduğumuz bir iz və böyük məsuliyyət kimi yanaşırıq.
Tikinti sektorunda ən böyük problem nədir: keyfiyyət, kadr çatışmazlığı, yoxsa etibar?
– Əslində bu üç məsələ bir-biri ilə sıx bağlıdır. Lakin kökündə etibar və peşəkar kadr problemi dayanır. İşini sevən, məsuliyyətli və peşəkar mütəxəssislər olduqda keyfiyyət də öz-özünə təmin edilir. Təəssüf ki, qısamüddətli qazanc naminə standartlardan güzəştə gedənlər bütövlükdə sektora olan etimadı zəiflədirlər. Halbuki insanlar sizə yalnız vəsaitlərini deyil, həm də özlərinin və ailələrinin təhlükəsizliyini etibar edirlər. Bizim üçün ən böyük dəyər məhz bu etimadı qorumaqdır.
Estetik görünüşlə təhlükəsizlik arasında balansı necə qorumaq olar?
– Bizim əsas prinsipimiz belədir: təhlükəsizlik təməldir, estetika isə onun üzərində qurulan memarlıq dəyəridir. Bina nə qədər müasir və cəlbedici görünsə də, əgər onun konstruksiyası etibarlı deyilsə, zəlzələyə davamlılıq normaları təmin olunmayıbsa və keyfiyyətli materiallardan istifadə edilməyibsə, həmin gözəlliyin heç bir mənası qalmır. Müasir texnologiyalar memarlara və mühəndislərə təhlükəsizlikdən güzəştə getmədən estetik layihələr həyata keçirmək imkanı verir. Biz də fəaliyyətimizdə bu prinsipi əsas götürürük.
Arxaya dönüb baxanda sizi ən çox qürurlandıran layihə hansıdır və niyə?
– Mənim üçün hər layihə özünəməxsus dəyərə malikdir. Onların hər birinə böyük zəhmət və sevgi sərf olunub. Lakin ən çox qürur duyduğum layihə insanların “Burada yaşamaq mənim arzum idi və bu yaşayış kompleksinə köçəndən sonra həyatımız dəyişdi” dediyi ilk böyük yaşayış kompleksimizdir. Xüsusilə uşaqların təhlükəsiz həyətlərdə oynadığını, ailələrin rahat şəkildə istirahət etdiyini görəndə anlayırsan ki, sən sadəcə bina tikməmisən. Sən insanların xoşbəxt və təhlükəsiz həyatına töhfə verən bir yaşayış mühiti yaratmısan. Mənim üçün ən böyük uğur da məhz budur.
Heydər Əıiyev prospekti 115 bina 187 c 5 ci mərtəbə otaq 503 B Təmir Azərbaycan
ƏLAQƏ TELEFONU: 0503099912; 0553099912
Gundelik.az
