Tədqiqatçılar TurboDiffusion adlı yeni süni intellekt video generasiya texnikasını təqdim ediblər. Bu texnologiya vizual keyfiyyəti itirmədən mövcud üsullardan 200 dəfəyə qədər daha sürətli şəkildə süni videolar yarada bilir.
Bu tədqiqat ShengShu Technology, Tsinghua Universiteti və Kaliforniya Universiteti, Berkeley ilə əlaqəli alimlərin birgə işi nəticəsində ortaya çıxıb. Yaradıcılarının sözlərinə görə, sistem video generasiyası prosesinə sərf olunan vaxtı kəskin şəkildə azaltmaq üçün hazırlanıb. Ənənəvi olaraq bu proses həm ləng, həm də böyük hesablama resursları tələb edən bir iş olub.
Nvidia-nın RTX 5090 qrafik kartı ilə təchiz olunmuş adi bir istifadəçi kompüterində aparılan sınaqlarda TurboDiffusion 5 saniyəlik standart keyfiyyətli (SD) video klipin yaradılma vaxtını 3 dəqiqədən çoxdan cəmi 1,9 saniyəyə endirib. Eyni uzunluqda yüksək keyfiyyətli (HD) video üçün isə bu vaxt təxminən 80 dəqiqədən 24 saniyəyə düşüb ki, bu da təqribən 200 qat sürət artımı deməkdir.
Hazırda ShengShu-nun Vidu platforması və OpenAI-nin Sora aləti kimi mövcud sistemlər qısa video kliplərin yaradılması üçün hələ də bir neçə dəqiqə vaxt tələb edir. TurboDiffusion isə saatlarla render gözləmək əvəzinə yaradıcıların saniyələr və ya dəqiqələr ərzində istifadəyə hazır videolar əldə etməsinə imkan verə bilər.
Bu texnologiya süni intellektlə video istehsalında əsas problemlərdən biri olan hesablama vaxtını ciddi şəkildə azaldır. Bu sürət artımı animasiya, kino istehsalı və məzmun yaradılması sahələrində daha sürətli iş axınlarının yolunu aça bilər — keyfiyyətdən güzəştə getmədən.
Bu irəliləyiş eyni zamanda real vaxtda və ya demək olar ki, ani AI video yaradılması dövrünün gözləniləndən daha yaxın ola biləcəyini göstərir. Lakin bu, tanış narahatlıqları da gündəmə gətirir. Video istehsalının sürətlənməsi və ucuzlaşması deepfake tipli saxta məzmunun daha sürətlə yayılmasına səbəb ola bilər.
AI ilə yaradılan videolar daha tez və asan istehsal olunduqca, doğrulama, sui-istifadə və təhlükəsizlik mexanizmləri ilə bağlı suallar daha da aktuallaşacaq. Xüsusilə də artıq süni intellekt mənşəli keyfiyyətsiz məzmunla mübarizə aparmaqda çətinlik çəkən platformalarda.
TurboDiffusion-un təqdimatı digər AI video alətlərinin də sürətlə inkişaf etdiyi bir vaxta təsadüf edir. Google-un Flow video yaradıcısına daha dərin yaradıcı idarəetmələr əlavə etməsi və Adobe Firefly-ın Premiere Pro daxilində mətn əsaslı video redaktəsi və birbaşa video generasiyasını genişləndirməsi bu sahənin nə qədər sürətlə irəlilədiyini açıq şəkildə göstərir.
Mənbə: Digital Trends
Hazırladı:Ziyalə Əhmədli
Gundelik.az