Ukrayna danışıqlarında yeni mərhələ: Putin və Trampın görüşü gözlənilir

Ukrayna danışıqlarında yeni mərhələ: Putin və Trampın görüşü gözlənilir

Rusiya Prezidenti Vladimir Putin, ABŞ Prezidentinin xüsusi nümayəndəsi Stiven Uitkoff və Amerika liderinin kürəkəni Cared Kuşner arasında Kremldə keçirilən danışıqlar başa çatıb. Görüşün nəticələrinə əsasən, Ukrayna ilə bağlı danışıqların növbəti mərhələsinə Avropa nümayəndələrinin də qoşulacağı məlum olub.

Gundelik.az lenta.ru-ya istinadən xəbər verir ki, bu barədə görüşdən sonra Uitkoff məlumat verib.

“Onlar bizim tərəfdaşlarımızdır və bu prosesdə iştirak etmələri onlar üçün vacibdir”, – deyə o bildirib.

Bundan əvvəl Uitkoff Vladimir Putinlə Moskvada keçirilən görüşün yekununda Rusiya, ABŞ və Ukrayna arasında üçtərəfli danışıqların növbəti raundunun keçirilməsi barədə razılıq əldə olunduğunu açıqlamışdı. Onun sözlərinə görə, Rusiya lideri ilə görüş zamanı münaqişənin nizamlanması istiqamətində irəliləyiş əldə edilib.

Noyabrın 12-də tərəflər Rusiya, ABŞ və Ukrayna arasında Əbu-Dabidə keçirilmiş son danışıqların nəticələrini, humanitar məsələləri, eləcə də Ukraynadakı münaqişənin həlli perspektivlərini müzakirə ediblər.

Putin Uitkoff və Kuşnerlə Zelenskinin davranışını müzakirə edib

Rusiya Prezidenti Vladimir Putin danışıqlar zamanı Stiven Uitkoff və Cared Kuşnerlə Ukrayna Prezidenti Volodimir Zelenskinin davranışını, eləcə də onun Donald Trampa ünvanladığı “salamları” müzakirə edib.

Bu barədə Rusiya Prezidentinin köməkçisi Yuri Uşakov jurnalistlərə açıqlamasında bildirib.

“Bugünkü danışıqlar zamanı Kiyev rejiminin rəhbərinin davranışı, eləcə də onun ABŞ Prezidentinə açıq şəkildə ünvanladığı, dırnaq arasında desək, ‘dostluq salamları’ müzakirə olunub”, – deyə Uşakov qeyd edib.

O, həmçinin Moskvanın Uitkoff və Kuşnerlə əlaqələri davam etdirdiyini vurğulayıb. Prezident köməkçisinin sözlərinə görə, Putinlə ABŞ nümayəndələri arasında söhbət məzmunlu, konstruktiv və faydalı olub.

Kreml DNR-də yeni humanitar missiyaya başlamağa hazır olduğunu açıqlayıb

Rusiya Prezidentinin köməkçisi Moskvanın Donetsk Xalq Respublikasının (DXR) Konstantinovka şəhərində yeni humanitar missiyanın hazırlanmasına dərhal başlamağa hazır olduğunu da bildirib.

“Bu yeni humanitar aksiya ilə bağlı amerikalı nümayəndələrlə konkret təmaslara başlamaq barədə razılıq əldə olunub. Ərazinin minalardan təmizlənməsi işlərinə dərhal başlamağa hazırıq”, – deyə Uşakov vurğulayıb.

Onun sözlərinə görə, belə bir missiya Konstantinovkanın həqiqətən kimin nəzarətində olduğunu hər kəsə nümayiş etdirməyə imkan verəcək.

Uşakov əlavə edib ki, ABŞ-ın xüsusi nümayəndələri Stiven Uitkoff və Cared Kuşner Rusiya liderinin Konstantinovkada, Aleshki şəhərindəki təcrübəyə əsaslanan humanitar missiyanın təşkili təklifini dəstəkləyiblər. Moskva və Vaşinqton nümayəndələri missiyanın təşkili ilə bağlı təmaslara başlamaq barədə razılığa gəliblər.

Bununla yanaşı, Uşakov Rusiya və Ukrayna arasında əsirlərin ən genişmiqyaslı mübadiləsinin parametrlərinin razılaşdırıldığını bildirib. Onun sözlərinə görə, 2025-ci ildən etibarən Ukrayna ilə 35 əsir mübadiləsi həyata keçirilib və bu prosesdə hər iki tərəfdən ümumilikdə təxminən beş min nəfər iştirak edib.

Putin, Uitkoff və Kuşner Kiyevin müharibəni bitirmək istəmədiyini bildiriblər

Rusiya Prezidentinin köməkçisi jurnalistlərlə söhbətində Putin, Uitkoff və Kuşner arasında keçirilən görüşdə Kiyevin müharibəni başa çatdırmaq istəmədiyi məsələsinin də müzakirə olunduğunu bildirib.

Uşakovun sözlərinə görə, bunun səbəbi müharibə başa çatdıqdan sonra Ukraynada ümumi seçkilərin elan edilməsinin zəruriliyi ilə əlaqələndirilib.

“Kiyevin müharibəni başa çatdırmaq istəmədiyi də qeyd olunub. Çünki bu halda dərhal ümumi seçkilərin keçirilməsi elan edilməli olacaq. Hakimiyyəti isə heç kim itirmək istəmir”, – deyə Uşakov bildirib.

O, həmçinin Rusiyanın ABŞ nümayəndələri ilə birlikdə yeni və uzunmüddətli təhlükəsizlik arxitekturasının parametrlərinin razılaşdırılmasına dərhal başlamağa hazır olduğunu vurğulayıb.

Kreml Uitkoff və Kuşnerlə danışıqların nəticələrini açıqlayıb

Yuri Uşakov Rusiyanın Stiven Uitkoff və Cared Kuşnerin Moskvanın mövqeyini Avropa ölkələrinə və Ukraynaya çatdıracağına ümid etdiyini bildirib.

“Kremldə bu qədər ətraflı söhbətdən sonra məlum olduğu kimi, amerikalı danışıqlarçılar Dublinə yola düşüblər. Orada onlar Volodimir Zelenski və Avropa paytaxtlarının nümayəndələri ilə görüşəcəklər. Ümid edirik ki, Moskvadan verilən mesajlar onlara diqqətlə çatdırılacaq”, – deyə Uşakov qeyd edib.

Onun sözlərinə görə, danışıqların yekununda Rusiya və ABŞ üçtərəfli təmasların davam etdirilməsi barədə də razılığa gəliblər.

Putin və Trampın APEC sammitində görüşü planlaşdırılır

Yuri Uşakov Rusiya Prezidenti Vladimir Putinlə ABŞ Prezidenti Donald Trampın Asiya-Sakit Okean İqtisadi Əməkdaşlıq Təşkilatının (APEC) sammiti çərçivəsində görüşünün planlaşdırıldığını açıqlayıb.

Uşakovun sözlərinə görə, Donald Tramp Ukraynadakı vəziyyətin nizamlanmasına şəxsən diqqət yetirir.

“Təbii ki, onunla Şençjendə keçiriləcək APEC sammiti çərçivəsində planlaşdırılan görüş zamanı münaqişənin nizamlanması ilə bağlı bütün məsələlərin müzakirəsi davam etdiriləcək”, – deyə Uşakov jurnalistlərə bildirib.

Qeyd edək ki, APEC sammitinin noyabrın 18-19-da Çinin Şençjen şəhərində keçirilməsi planlaşdırılır.

Nuri
Gundelik.az

Xəta tapdınız? Mətni seçib Ctrl + Enter basın — redaksiyaya göndərilsin.