Gülçin Aslanlı: “Azərbaycanın mədəni irsi yalnız keçmişimizin deyil, gələcəyimizin də ən böyük sərvətidir”

Gənc sahibkar, yaradıcı lider və mədəniyyət təşəbbüskarı, ASLANLI MUSEUM – Mədəniyyət və Yaradıcılıq Mərkəzinin təsisçisi və rəhbəri Gülçin Aslanlı Azərbaycanın milli-mədəni irsinin beynəlxalq səviyyədə təbliği, tarixi dəyərlərin müasir təqdimat üsulları ilə tanıdılması və gənc nəslin mədəni irsə marağının artırılmasının əhəmiyyəti barədə fikirlərini bölüşüb.

Gülçin Aslanlı Gundelik.az-a açıqlamasında bildirib ki, Azərbaycan zəngin tarixi, çoxəsrlik ənənələri, sənətkarlıq nümunələri, memarlıq abidələri, musiqisi və milli-mənəvi dəyərləri ilə dünya mədəniyyətində özünəməxsus yer tutur.

Onun sözlərinə görə, bu irsin qorunması ilə yanaşı, onun müasir dövrün imkanlarından istifadə etməklə beynəlxalq auditoriyaya çatdırılması da mühüm vəzifədir:

“Azərbaycanın mədəni irsi yalnız keçmişimizin deyil, gələcəyimizin də ən böyük sərvətidir. Biz bu irsi qorumaqla yanaşı, onu müasir dünyanın dilində təqdim etməyi bacarmalıyıq. Milli-mədəni dəyərlərimizin beynəlxalq səviyyədə tanıdılması Azərbaycanın mədəni kimliyinin, tarixinin və zəngin yaradıcılıq potensialının dünyaya çatdırılması deməkdir. Bu istiqamətdə muzeylərin, mədəniyyət mərkəzlərinin, yaradıcı platformaların və özəl təşəbbüslərin üzərinə böyük məsuliyyət düşür.

Düşünürəm ki, tarixi irsin təqdimatında ənənəvi yanaşmalarla kifayətlənmək olmaz. Rəqəmsal texnologiyalar, interaktiv ekspozisiyalar, vizual hekayəçilik, müasir dizayn həlləri və yaradıcı layihələr mədəni irsi daha əlçatan və cəlbedici edə bilər. Tarixi eksponat sadəcə nümayiş etdirilən əşya deyil, özündə bir dövrün həyat tərzini, düşüncəsini, sənətini və insan hekayəsini yaşadan dəyərdir. Biz bu hekayələri müasir auditoriyanın marağına uyğun şəkildə təqdim etməliyik".

Həmsöhbətimin fikrincə, xüsusilə gənc nəslin milli-mədəni irsə marağının artırılması prioritet istiqamətlərdən biri olmalıdır.

"Gənclər mədəniyyəti yalnız öyrənməməli, onun iştirakçısına və yaradıcı daşıyıcısına çevrilməlidirlər. Bunun üçün maarifləndirici proqramlar, ustad dərsləri, interaktiv tədbirlər, yaradıcılıq emalatxanaları və innovativ muzey layihələri mühüm rol oynayır. Gənc bir insan milli sənət nümunəsini özü təcrübədən keçirdikdə, onun dəyərini daha dərindən anlayır və bu irsin gələcək nəsillərə ötürülməsində maraqlı tərəfə çevrilir.

ASLANLI MUSEUM – Mədəniyyət və Yaradıcılıq Mərkəzi olaraq bizim də əsas məqsədlərimizdən biri mədəni irsi müasir yaradıcılıq yanaşmaları ilə birləşdirmək, ənənə ilə innovasiya arasında körpü yaratmaqdır. İnanıram ki, mədəniyyət yalnız qorunmalı olan bir miras deyil, həm də daim inkişaf etdirilməli, yeni ideyalarla zənginləşdirilməli və gələcəyə ötürülməli canlı bir dəyərdir. Azərbaycanın mədəni irsini dünyaya tanıtmaq və gənc nəsildə bu irsə sahiblik hissini gücləndirmək hər birimizin ortaq məsuliyyətidir”, – deyə Gülçin Aslanlı vurğulayıb.

Nuri
Gundelik.az