Uzun və sağlam ömrün əsasında düzgün həyat tərzi dayanır. Mütəxəssislər bildirirlər ki, qidalanma, yuxu və stressin idarə olunması bu prosesin ən vacib sütunlarıdır. Gündəlik həyatda edilən kiçik dəyişikliklər uzunmüddətli perspektivdə sağlamlığa böyük müsbət təsir göstərə bilər.
Mütəxəssislərin fikrincə, uzun və sağlam ömür üçün təkcə bir vərdiş kifayət etmir. Qidalanma, yuxu rejimi, fiziki aktivlik və stressin idarə olunması birlikdə nəzərə alınmalıdır. Məhz bu amillərin tarazlığı orqanizmin ümumi sağlamlığını qorumağa kömək edir.
Sağlam həyatın əsas şərtlərindən biri düzgün qidalanmadır. Tərəvəz və meyvələrlə zəngin, keyfiyyətli zülal və faydalı yağlar ehtiva edən qidalanma rejimi, eyni zamanda emal olunmuş məhsullar, şəkər və sadə karbohidratların məhdudlaşdırılması uzunmüddətli sağlamlıq üçün böyük əhəmiyyət daşıyır.
Həftə ərzində müntəzəm fiziki fəaliyyət də vacibdir. Güc məşqləri ilə yanaşı, gəzinti və ya digər kardio məşqləri orqanizmin aktiv qalmasına kömək edir.
Funksional tibb üzrə həkim və fitoterapevt Dr. Bekir Uğur Yavuzcan vurğulayır ki, sağlam həyat yalnız düzgün qidalanmaqdan ibarət deyil. Onun sözlərinə görə, keyfiyyətli yuxu, stressin idarə olunması və ümumi həyat tərzi də sağlamlığın ayrılmaz hissəsidir.
Yuxu da mühüm rol oynayır. Gündə 7–9 saat keyfiyyətli yuxu almaq tövsiyə olunur. Yuxusuzluğun uzun müddətdə maddələr mübadiləsini zəiflədə, hətta insulin balansına mənfi təsir göstərə biləcəyi bildirilir.
Stressin idarə olunması da sağlam həyat üçün vacibdir. Meditasiya, nəfəs məşqləri və sevimli hobbilərlə məşğul olmaq sinir sisteminin tarazlığını qorumağa kömək edir.
Bundan əlavə, kifayət qədər su içmək, mütəmadi tibbi müayinələrdən keçmək, siqaretdən uzaq durmaq, alkoqol qəbulunu məhdudlaşdırmaq və sağlam bədən çəkisini qorumaq uzunömürlülüyü dəstəkləyən əsas amillər sırasındadır.
Sosial əlaqələrin güclü saxlanılması və zehni aktiv fəaliyyətlə məşğul olmaq da həm psixoloji, həm də ümumi sağlamlığa müsbət təsir göstərir.
Sağlam insanların tətbiq etdiyi 7 əsas vərdiş:
Balanslı və sağlam qidalanmaq.
Müntəzəm fiziki fəaliyyətlə məşğul olmaq.
Hər gecə 7–9 saat keyfiyyətli yuxu yatmaq.
Stressi düzgün idarə etmək.
Kifayət qədər su qəbul etmək.
Siqaret çəkməmək, alkoqolu məhdudlaşdırmaq və mütəmadi tibbi müayinədən keçmək.
Sosial münasibətləri gücləndirmək və zehni daim aktiv saxlamaq.
Mənbə:CNN Türk
Hazırladı:Ziyalə Əhmədli
Gundelik.az
