Rusiyalı oliqarxla əlaqəli lüks yaxta regiondakı gərginliyə rəğmən kritik su yolundan keçərək diqqət çəkdi.
Rusiyanın tanınmış milyarderlərindən biri ilə əlaqələndirilən “Nord” adlı təxminən 500 milyon dollar dəyərində super yaxta, davam edən blokadaya baxmayaraq Hörmüz boğazından keçib. 142 metr uzunluğundakı gəmi həftə sonu Dubaydan yola düşərək Maskat istiqamətində hərəkət edib.
Bu keçid son aylarda bölgədə nadir qeydə alınan fərdi gəmi hərəkətlərindən biri hesab olunur. Çünki hazırda regionda təhlükəsizlik riski və siyasi gərginlik səbəbindən dəniz trafiki əvvəlki səviyyədən xeyli aşağıdır.
Qlobal enerji üçün kritik nöqtə
Hörmüz boğazı dünya üzrə xam neft və mayeləşdirilmiş təbii qazın (LNG) təxminən beşdə birinin daşındığı əsas marşrutlardan biridir. Bölgədəki gərginlik və tətbiq olunan məhdudiyyətlər enerji bazarına birbaşa təsir edir və qiymətlərin artmasına səbəb olur. Son məlumatlara görə, Brent markalı neftin bir bareli 109 dollara qədər yüksəlib.
Rusiya–İran yaxınlaşması
Hadisə fonunda İran ilə Rusiya arasında münasibətlərin daha da möhkəmləndiyi müşahidə olunur. İranın xarici işlər naziri Abbas Arakçi Sankt-Peterburqda Vladimir Putin ilə görüşərək iki ölkə arasındakı strateji əməkdaşlığı vurğulayıb.
Sanksiyalar altındakı oliqarx
“Nord” yaxtasının Aleksey Mordaşov ilə əlaqəli olduğu bildirilir. “Severstal” şirkətinin rəhbəri olan Mordaşov, Rusiyanın 2022-ci ildə Ukraynaya hücumundan sonra Qərb ölkələrinin sanksiya siyahısına daxil edilib.
Bundan əvvəl Honq Konq və Maldivlər də yaxtaya qarşı məhdudiyyət tətbiq etməmişdi.
Hazırda Mordaşovun yaxtada olub-olmadığı isə məlum deyil.
Mənbə: TRT Haber
Hazırladı: Ziyalə Əhmədli
Gundelik.az
