Keir Starmer rəhbərlik böhranı fonunda partiya daxilində artan təzyiqlərlə üz-üzə qalıb. O, Leyborist Partiyası deputatları və nazirlərinə xəbərdarlıq edərək bildirib ki, mümkün liderlik yarışı partiyanı “xaosa sürükləyə” bilər.
Baş nazir parlamentdə çıxışı zamanı səhiyyə, mənzil və immiqrasiya sahələrində yeni islahatlar vəd edib və deputatları “işçi təbəqəni uğursuzluğa düçar edən status-kvonu dəyişmək” üçün birləşməyə çağırıb.
Bu böhran ötən həftə İngiltərədə keçirilən yerli seçkilərdə, eləcə də Şotlandiya və Uelsdə Leyboristlərin ağır məğlubiyyətindən sonra daha da dərinləşib. Seçki nəticələrindən sonra dörd nazir istefa verib, onlarla deputat isə Starmerin vəzifədən getməsini istəyib.
Bu arada, səhiyyə naziri Wes Streetingin yaxın günlərdə partiya liderliyi uğrunda Starmerə meydan oxuya biləcəyi barədə iddialar güclənib. BBC-yə danışan Streeting tərəfdarları onun artıq cümə axşamı liderlik yarışına qoşula biləcəyini deyiblər.
Leyborist Partiyasının qaydalarına əsasən, liderlik yarışının başlaması üçün Streetingin ən azı 81 deputatın dəstəyini qazanması lazımdır.
Starmer və Streeting çərşənbə günü səhər Baş nazirlik iqamətgahı olan Downing Street-də qısa görüş keçiriblər. Baş nazirin sözçüsü Starmerin Streetingə “tam etimad göstərdiyini” desə də, görüşün detalları açıqlanmayıb.
Axşam saatlarında Starmer parlamentdə nazirlər və deputatlarla keçirdiyi görüşlərdə bildirib:
“Liderlik yarışının bizi xaosa sürükləməsinə imkan verə bilmərik – belə bir çağırış bunu yüz faiz edər.”
Görüşlərdə bəzi nazirlər hökumətin daha “üsyankar” və fərqli idarəçilik üslubu sərgiləməli olduğunu deyiblər. Starmer isə hökumətin yanaşmasını dəyişməli olduğunu qəbul edib.
Mənbə:BBC
Hazırladı:Ziyalə Əhmədli
Gundelik.az
