Günəşin parlaq işığında gizlənmiş yeni asteroid Yerə təhlükəli dərəcədə yaxın məsafədə kəşf edilib.
Gundelik.az-ın məlumatına görə, Carnegie Elm İnstitutunun astronomu Skott S. Şeppard 27 sentyabr tarixində Blanco teleskopu vasitəsilə obyektin mövcudluğunu müəyyən edib və ona 2025 SC79 adı verilib.
Yeni kəşf edilən asteroid Atira qrupuna daxil olan 39-cu üzvdür. Bu qrupun əsas xüsusiyyəti ondan ibarətdir ki, onların orbitləri tamamilə Yerin daxilində yerləşir. Qeyd olunur ki, bu, indiyədək orbitinin tamamilə Venera daxilində olması təsdiqlənən ikinci asteroiddir.
2025 SC79 Günəş ətrafında cəmi 128 gün ərzində tam dövr edir və bəzən Merkuri orbitini keçərək məlum olan ən qısa orbital dövrlərdən birinə malikdir.
Təxminən 700 metr enində olan bu asteroid “qatil asteroid” kimi təsnif edilir. Alimlərin fikrincə, o, Yerə çarpacağı halda qitə miqyasında dağıntılara səbəb ola bilər. Belə bir təsir nəticəsində milyardlarla insan və heyvanın həyatına təhlükə yaranacağı ehtimal olunur.
Skott Şeppard bildirib ki, “ən təhlükəli asteroidləri aşkar etmək çox çətin prosesdir”. Onun sözlərinə görə, bu cür obyektləri yalnız alatoranlıq saatlarında – günəşin çıxması və ya batması zamanı müşahidə etmək mümkündür.
Hazırda Günəşin arxasında yerləşən 2025 SC79 bir neçə aydan sonra yenidən görünəcək. Alimlər həmin vaxt obyektin tərkibini və Günəşə bu qədər yaxın məsafədə necə mövcud ola bildiyini öyrənmək üçün əlavə müşahidələr aparacaqlar.
Tədqiqatçılar hesab edirlər ki, bu cür kəşflər Günəş sisteminin yaranma tarixini daha dərindən anlamağa və Yer planetini potensial təhlükəli təsirlərdən qorumağa imkan verəcək.
Gundelik.az
