Google ən güclü versiyası olan Gemini 3.6 Flash və kibertəhlükəsizlik sahəsi üçün xüsusi hazırlanmış Gemini 3.5 Flash Cyber daxil olmaqla üç yeni süni intellekt modelini istifadəyə təqdim edib.
Şirkət bu addımla proqram təminatındakı təhlükəsizlik boşluqlarını aşkar edən sistemləri ilə tanınan Anthropic və OpenAI kimi rəqibləri ilə rəqabətdə mövqeyini gücləndirməyi hədəfləyir.
Süni intellekt modellərinin reytinq siyahılarına əsasən, Gemini 3.6 Flash proqramlaşdırma və maliyyə əməliyyatlarında yüksək nəticələr göstərən əvvəlki Flash versiyasının imkanlarını daha da təkmilləşdirib. Yeni modelin istifadə dəyərinin də əvvəlki versiyaya nisbətən daha aşağı olduğu bildirilir.
Google-un məlumatına görə, Gemini 3.5 Flash Cyber modeli isə təhlükəsizlik boşluqlarını aşkar etmək və aradan qaldırmaq prosesini digər iri həcmli modellərlə müqayisədə daha aşağı xərclə həyata keçirə bilir.
Təqdim olunan üçüncü model – Gemini 3.5 Flash-Lite isə rəqəmsal şəxsi köməkçi kimi fəaliyyət göstərən avtonom süni intellekt agentlərinin idarə olunması kimi tapşırıqlar üçün hazırlanıb.
Google-un Gemini məhsullarının idarə edilməsi üzrə baş direktoru Tulsee Doshi bildirib ki, yeni Flash modelləri məhsuldarlıq və keyfiyyət arasında ən optimal tarazlığı təmin etmək məqsədilə hazırlanıb.
Şirkətin ən yüksək performanslı sistemi olması gözlənilən Gemini 3.5 Pro modeli üzərində isə işlər davam edir.
Google may ayında bu modelin iyun ayında istifadəyə veriləcəyini açıqlamışdı. Lakin şirkət hazırda sınaqların davam etdiyini, model tam hazır olduqdan sonra geniş istifadəçi kütləsinin ixtiyarına veriləcəyini bildirib.
Kibertəhlükəsizlik sahəsində rəqabət güclənir
Son aylarda Anthropic, OpenAI, Çin mənşəli startaplar və Meta tərəfindən təqdim olunan yeni modellər rəqabəti daha da artırıb. Eyni zamanda, kibertəhlükəsizlik süni intellekt sahəsinin əsas inkişaf istiqamətlərindən birinə çevrilib.
Süni intellekt modelləri proqram təminatındakı xətaları insanlardan daha sürətli aşkar edib aradan qaldıra bilsə də, eyni zamanda kibercinayətkarlar tərəfindən hücumlar həyata keçirmək üçün də istifadə oluna bilər.
Google bildirib ki, Gemini 3.5 Flash Cyber modeli üçün təhlükəsizlik baxımından məhdud giriş siyasəti tətbiq olunacaq.
Şirkətin məlumatına əsasən, model mürəkkəb açıq mənbəli V8 JavaScript Engine proqramı üzərində aparılan sınaqlarda 55 fərqli təhlükəsizlik problemini müəyyən edib. Onlardan 10-u indiyədək heç bir süni intellekt modeli tərəfindən aşkarlanmamış kritik boşluqlar olub.
Tulsee Doshi qeyd edib ki, model ilkin mərhələdə yalnız hökumətlər və etibarlı tərəfdaşların istifadəsinə veriləcək. Bu yanaşma müdafiə qruplarına kritik boşluqları onların bədniyyətli şəxslər tərəfindən istismar edilməsindən əvvəl aradan qaldırmağa imkan verəcək.
Bundan əlavə, yeni Flash modellərinin əvvəlki versiyalarla müqayisədə 17 faiz daha az token istifadə etdiyi bildirilir. Bu isə proqram təminatı hazırlayan mütəxəssislərə eyni əməliyyatları daha aşağı xərc və daha yüksək səmərəliliklə yerinə yetirməyə imkan verir.
Mənbə:TRT Haber
Hazırladı:Ziyalə Əhmədli
Gundelik.az
