ChatGPT-nin bizə hər şeyi öyrədən şirkəti indi OpenAI-dən bunun əvəzini ödəməsini tələb edir.
Süni intellekt şirkətlərinin modellərini öyrətmək üçün internetdəki məqalələrdən icazəsiz və ödəniş etmədən istifadə etdiyi geniş şəkildə qəbul olunur. The New York Times, Chicago Tribune və Toronto Star kimi nəşrlər artıq bu praktikaya qarşı məhkəmə iddiaları qaldırıblar. İndi isə daha bir tanınmış təşkilat bu hüquqi prosesə qoşulub.
Encyclopedia Britannica və onun törəmə qurumu Merriam-Webster, OpenAI-yə qarşı iddia qaldıraraq, şirkətin icazəsiz şəkildə təxminən 100 min məqaləni toplayıb (scraping) öz dil modellərini öyrətmək üçün istifadə etdiyini və bunun “kütləvi müəllif hüquqları pozuntusu” olduğunu bildiriblər.
Məhkəmə işi nə haqqındadır?
Britannica iddia edir ki, ChatGPT onun məzmununu əvəz edən cavablar yaradır və bu da sayta daxilolmaları və gəlirləri azaldır. Əgər istifadəçilər suallarına birbaşa ChatGPT-dən cavab ala bilirlərsə, onlar sayta daxil olmağa daha az maraq göstərə bilərlər.
Şikayətdə həmçinin ChatGPT-nin RAG (Retrieval-Augmented Generation) prosesində Britannica məzmunundan istifadə etməsi də qeyd olunur. Bu proses zamanı süni intellekt cavab verərkən internetdə aktual məlumatları axtarır. Britannica isə iddia edir ki, AI bu zaman onların məzmununu tam və ya qismən təkrar edir.
Bundan əlavə, şirkət OpenAI-ni əmtəə nişanı qanunlarını pozmaqda da günahlandırır. Onların fikrincə, ChatGPT bəzən yanlış məlumatlar (hallucination) yaradır və bunu səhv şəkildə Britannica-ya aid edir. Bu isə “ictimaiyyətin etibarlı və keyfiyyətli məlumatlara çıxışını təhlükə altına qoyur”.
Bundan sonra nə baş verəcək?
Ən böyük sual budur. Hələlik süni intellektin müəllif hüquqları ilə qorunan məzmun üzərində öyrədilməsinin qanuni olub-olmaması ilə bağlı güclü hüquqi presedent yoxdur.
Məsələn, Anthropic ilə bağlı yaxın bir məhkəmə işində federal hakim qərar verib ki, müəllif hüquqları ilə qorunan məzmunun təlim üçün istifadəsi kifayət qədər “transformativ”dir və qanuni sayılır. Lakin eyni zamanda, şirkətin milyonlarla kitabı qanunsuz yüklədiyi müəyyən edilib və nəticədə 1.5 milyard dollarlıq razılaşma əldə olunub.
Bu məsələ inkişaf etdikcə, qanunvericilərin hələ həll etməli olduğu çoxlu suallar qalır. Bu işlərin nəticəsi gələcəkdə AI şirkətlərinin internet məzmunundan necə istifadə edə biləcəyini müəyyənləşdirə bilər.
Mənbə: Digital Trends
Hazırladı: Ziyalə Əhmədli
Gundelik.az
