Qidalanma vərdişləri yalnız çəkiyə deyil, həm də bioloji yaşa birbaşa təsir göstərir. Neyroalim Dr. David Cox bildirir ki, ultra emal olunmuş qidalar, həddindən artıq kalori qəbulu və qeyri-sağlam qidalanma orqanizmin daha sürətlə qocalmasına səbəb olur. Onun sözlərinə görə, Omeqa-3, yaşıl yarpaqlı tərəvəzlər və minerallarla zəngin qidalar isə sağlam qocalmanı dəstəkləyən əsas amillərdəndir.
Dr. Cox qeyd edir ki, uzun və sağlam ömrün sirri bahalı kosmetik vasitələrdə deyil, düzgün qidalanmadadır. O hesab edir ki, düzgün qida seçimi, yemək rejiminin dəyişdirilməsi və Omeqa-3 ilə mineral qəbulunun artırılması bioloji qocalma prosesini ləngidir.
Mütəxəssis son illərdə piylənmə, diabet, metabolik xəstəliklər, həmçinin 50 yaşdan aşağı insanlarda xərçəng və iltihabi xəstəliklərin artmasını “sürətlənmiş qocalmanın əlamətləri” kimi qiymətləndirir. Bununla yanaşı, o vurğulayır ki, düzgün qidalanma bu prosesi yavaşlatmağa kömək edir.
Dr. Cox sağlam qidalanma üçün aşağıdakı tövsiyələri verir:
Gündə ən azı 5 porsiya meyvə və tərəvəz istehlak edin.
Ultra emal olunmuş məhsullar əvəzinə təbii və tam qidalara üstünlük verin.
Liflə zəngin qidalar qəbul edin.
Hər yeməkdə kifayət qədər zülal olsun.
Həftədə üç dəfə yağlı balıq yeyin
Dr. Cox-un sözlərinə görə, həftədə üç dəfə somon kimi yağlı balıq yemək Omeqa-3 yağ turşularına olan tələbatı ödəməyə kömək edir. Klinik araşdırmalar Omeqa-3-ün DNT səviyyəsində qocalma prosesini ləngidə biləcəyini göstərir.
Axşam yeməyini yüngül seçin
Mütəxəssis bildirir ki, insan orqanizmi gündüz saatlarında qidanı daha səmərəli həzm edir. Buna görə də, həftənin ən azı bir neçə günü səhər və ya nahar yeməyinin daha doyumlu, axşam yeməyinin isə daha yüngül olması tövsiyə edilir.
Yaşıl yarpaqlı tərəvəzləri unutmayın
İspanaq, kahı və digər yaşıl yarpaqlı tərəvəzlər böyrəklərin fəaliyyətini dəstəkləyən minerallarla zəngindir. Bundan əlavə, böyürtkən, yaşıl çay və tünd şokolad kimi flavonoid və polifenol tərkibli qidalar da sağlam yaşlanmanı dəstəkləyir.
Maqnezium və sinkə diqqət edin
Dr. Cox xüsusilə maqnezium və sinkin vacibliyini vurğulayır. Bu minerallar insulin müqavimətinin azalmasına kömək edir və 2-ci tip diabet riskini aşağı sala bilər.
Sinklə zəngin qidalar: ət, qabıqlı dəniz məhsulları, süd məhsulları və tam taxıllar.
Maqneziumla zəngin qidalar: ispanaq, qoz-fındıq və tam taxıllı məhsullar.
Mütəxəssisin fikrincə, düzgün qidalanma vərdişləri yalnız ömrü uzatmır, həm də sağlam keçən illərin sayını artırmağa kömək edir.
Mənbə:CNN Türk
Hazırladı:Ziyalə Əhmədli
Gundelik.az
