Bal alırsınız, amma nə aldığınızı həqiqətən bilirsinizmi? Bazarda müxtəlif adlarla təqdim olunan bal məhsulları ilə bağlı istehlakçıların diqqətli olması vacibdir. Məhsulun rəngi, dadı və görünüşü onun keyfiyyəti barədə tam təsəvvür yaratmır. Əslində isə keyfiyyətli balın arxasında düzgün arıçılıq, istehsal və saxlanma prosesi dayanır.
“Pure Honey” şirkətinin rəhbəri, arıçılıq üzrə mütəxəssis Fərid Babayev mövzu ilə bağlı Gundelik.az-a açıqlamasında istehlakçıları bal seçərkən daha diqqətli olmağa çağırıb.
Mütəxəssisin sözlərinə görə, balın yalnız görünüşünə baxaraq onun təbii olub-olmaması barədə nəticə çıxarmaq düzgün deyil:
“İstehlakçıların ən çox yol verdiyi səhvlərdən biri balın keyfiyyətini yalnız rənginə və qatılığına görə müəyyənləşdirməyə çalışmaqdır. Halbuki balın rəngi onun hansı bitkidən toplandığından asılı olaraq dəyişə bilər. Eyni zamanda kristallaşmış balı avtomatik olaraq keyfiyyətsiz hesab etmək də yanlışdır”.
Fərid Babayev bildirib ki, balın keyfiyyətinə təsir edən əsas amillərdən biri onun əldə olunma və saxlanma şəraitidir. Onun sözlərinə görə, məhsulun haradan və kim tərəfindən istehsal edildiyi istehlakçı üçün əsas suallardan biri olmalıdır.
“Bal alarkən ilk növbədə məhsulun mənşəyinə, istehsalçısına və saxlanma şəraitinə diqqət etmək lazımdır. Təkcə qablaşdırmaya və xarici görünüşə güvənmək olmaz. İstehlakçı məhsulun arxasında real istehsalçının olub-olmadığını bilməlidir”, – deyə mütəxəssis vurğulayıb.
Mütəxəssis həmçinin balın saxlanma temperaturuna xüsusi diqqət çəkib. Onun sözlərinə görə, balın yüksək temperaturda saxlanılması məhsulun təbii xüsusiyyətlərinə mənfi təsir göstərə bilər.
Balın kristallaşması ilə bağlı da yanlış təsəvvürlər mövcuddur. Fərid Babayev qeyd edib ki, bəzi təbii bal növlərinin zaman keçdikcə kristallaşması normal haldır və bu proses məhsulun mütləq şəkildə keyfiyyətsiz olması anlamına gəlmir.
Beləliklə, bazarda bal seçərkən “təbii”, “kənd balı” və digər ifadələrə kor-koranə inanmaq əvəzinə, məhsulun mənşəyi və istehsalçısı araşdırılmalıdır. Çünki balın keyfiyyətini onun üzərində yazılan sözlər deyil, istehsal prosesi müəyyən edir.
Nurəddin Abdullayev
Gundelik.az
