“Apple” noyabrın sonuna qədər yeni “Apple TV” və “HomePod” mini modellərini təqdim etməyi planlaşdırır.
Bu barədə Gundelik.az “MacRumors”a istinadən xəbər verir.
Məlumat tanınmış insayder və “Bloomberg” müxbiri Mark Qurmana istinadən yayılıb.
Qurmanın sözlərinə görə, şirkət noyabrın 11-i axşam pərakəndə satış mağazalarında inventar yenilənməsi planlaşdırır. Bu prosesin ertəsi gün yeni cihazların nümayişi ilə üst-üstə düşəcəyi ehtimal edilir.
Mütəxəssislər qeyd edirlər ki, mövcud Apple TV və HomePod mini modellərinin ehtiyatlarının azalması adətən yenilənmiş versiyaların yaxın zamanda təqdim olunacağından xəbər verir. Qurman bildirib ki, buraxılış 2025-ci ilin sonuna qədər baş verməsə belə, yeni cihazların təqdimatı çox gecikməyəcək.
Yeni modellərin əsas məqsədi gələn il istifadəyə veriləcək yeni Siri və Apple Intelligence funksiyalarını nümayiş etdirmək olacaq.
MacRumors əlavə edir ki, son qazanc hesabatında Apple 2026-cı ilin sonuna qədər yeni Mac modellərinin təqdimatını planlaşdırmadığını bildirib. Bu isə Apple TV və HomePod mini-ni ilin sonuna qədər şirkətin ən real yeni məhsul namizədlərinə çevirir.
Qeyd edək ki, daha əvvəl yayılan məlumatlara əsasən, Apple yeni Siri versiyasına Google-un Gemini süni intellekt sistemini inteqrasiya etməyi planlaşdırır.
Gundelik.az
