Keçən avqustda Apple-ın büdcəyə uyğun MacBook üçün planlaşdırıldığı deyilən 599 dollarlıq qiymət indi getdikcə şübhəli görünür.
Təchizat zənciri mənbələri ilk dəfə bu rəqəmi açıqlayanda, nəzəri baxımdan məntiqli idi — M1 MacBook Air-in Walmart-da endirimli qiymətinə yaxın və Apple-ın noutbuk xəttini tamamilə yeni bir alıcı qrupuna açmaq üçün kifayət qədər aşağı. Lakin komponentlərin qiyməti o vaxtdan bəri Apple-ın əleyhinə dəyişib və xüsusilə iki sahə problem yaradır (mənbə: DigiTimes).
Yaddaş (Memory) əsas problemə çevrilib. Son bir ildə qiymətlər kəskin artıb, sənayedə ümid edilən yüngülləşdirici amil — Çin yaddaş istehsalçılarının istehsalını artırması — istənilən səviyyədə baş verməyib.
Bu təchizatçılar maksimum istehsal gücündədir və daxili müştərilərə fokuslanıblar. Apple isə tarixən belə dövrlərdə ən pis təsirləri azaltmaq üçün kifayət qədər satınalma gücünə malik olsa da, bu dəfə vəziyyət fərqlidir. Tim Cook son maliyyə hesabatında qeyd edib ki, Q1 2026 üçün təsir məhdud olsa da, Q2 və sonrasında təzyiq artacaq.
Batareyalar da vəziyyəti ağırlaşdırır. Litium batareya istehsalında əsas komponent olan kobaltın qiyməti 2025-ci ilin əvvəlində ton başına təxminən 21,500 dollardan 56,000 dollardan yuxarıya qalxıb, səbəb isə Kongo Demokratik Respublikasının ixracı qadağan etməsidir. Bu, 161% artım deməkdir. Yalnız fevral ayında batareya modulunun qiyməti 10–15% artıb. Bu da göstərir ki, 599 dollarlıq qiymət artıq real görünmür.
Buna görə, 599 dollarlıq “xəyali” qiymət əsasən gündəmdən çıxıb. Təchizat zəncirindəki mövcud təxminlər qiymətin 699–749 dollar arasında olacağını göstərir.
Bu, Apple üçün həqiqətən narahat vəziyyət yaradır. M4 MacBook Air 999 dollardan başlayır — amma satışa çıxanda endirimli olur, təhsil qiymətləri ilə ucuzlaşır və pərakəndə satışda tez-tez bundan aşağı düşür. Ucuz model 749 dollara yaxınlaşırsa, artıq yeni kateqoriya açmaq əvəzinə, alıcıları Air-ə yönəltmək üçün vitrin məhsulu kimi görünür.
Ucuza satılan modeldən gözlənilən xüsusiyyətlər:
iPhone-ların A seriyalı çipi
Mövcud Air-dən daha incə və yüngül dizayn
Kiçik ekran
Yəni kifayət qədər yaxşı texniki göstəricilər — sadəcə əvvəlki şayiələrin yaratdığı “partlayıcı” giriş nöqtəsi kimi təsir bağışlamır.
Mənbə: Digital Trends
Hazırladı: Ziyalə Əhmədli
Gundelik.az
