Dəniz dibində 2000 illik üzük tapılıb.
Gundelik.az xəbər verir ki, “People” nəşrinin məlumatına görə, Misirdə sualtı xarabalıqları tədqiq edən arxeoloqlar bürünc möhürlü üzük aşkar ediblər.
Təxminən 2000 il əvvəl hazırlanmış bu zinət əşyası Aralıq dənizinin dibində, İsgəndəriyyə şəhərinin sualtı xarabalıqları arasında tapılıb. Ehtimal olunur ki, üzüyün üzərində Qədim Dünyanın Yeddi Möcüzəsindən biri olan İsgəndəriyyə Mayakının təsviri əks olunub.
Misirin Qədim Abidələr üzrə Ali Şurasının baş katibi Hişam əl-Leysi bu tapıntını müstəsna hadisə kimi qiymətləndirib. O qeyd edib ki, arxeoloqlar indiyədək heç vaxt qədim mayakın təsviri olan möhürlü üzük aşkar etməyiblər.
Artefakt keçmişdə kral sarayının yerləşdiyi Antirodos kral adasında tapılıb. Həmin saray eramızdan əvvəl 29-25-ci illər arasında Misirə səfər etmiş yunan tarixçisi və coğrafiyaçısı Strabon tərəfindən təsvir edilmişdi. Bu yeni tapıntıya əsaslanaraq, arxeoloqlar sarayın eramızın II əsrinə qədər istifadədə qaldığını ehtimal edirlər. Çox güman ki, o, mayakın idarə olunması da daxil olmaqla, inzibati fəaliyyət mərkəzi kimi xidmət edib.
Faros Mayakı kimi də tanınan İsgəndəriyyə Mayakı eramızdan əvvəl III əsrdə İsgəndəriyyədəki Faros adasında inşa edilib. Təxminən 120–140 metr hündürlüyə malik olan bu tikili qədim dünyanın ən hündür qurğularından biri idi. Mayak XIV əsrə qədər baş verən bir sıra zəlzələlər nəticəsində dağılıb.
Daha əvvəl xəbər verilmişdi ki, 58 yaşlı britaniyalı Nik Berri metal detektoru vasitəsilə unikal qızıl kulon aşkar edib. Əşyanın təxminən min illik tarixə malik olduğu güman edilir.
Nurəddin Abdullayev
Gundelik.az
