Yeni bir araşdırma göstərir ki, həftədə 90–120 dəqiqə ağırlıq (güc) məşqləri etmək erkən ölüm riskini əhəmiyyətli dərəcədə azalda bilər.
Araşdırmanın nəticələri
Onilliklər boyu aparılan tədqiqatlardan toplanan məlumatlar göstərir ki, uzun müddət müntəzəm olaraq müqavimət və ya ağırlıq məşqləri etmək ürək xəstəlikləri və insultdan ölüm ehtimalını ciddi şəkildə azaldır.
Eyni zamanda, bu məşqlərin nevroloji xəstəliklərdən ölüm riskini də azaltdığı müəyyən edilib.
Mütəxəssislər bildirirlər ki, bu nəticələr güc məşqlərinin sağlamlığın pisləşməsinin qarşısını almaqda və ya onu gecikdirməkdə mühüm rol oynaya biləcəyinə dair yeni sübutlar təqdim edir. Bu da səhiyyə sistemlərinə düşən yükü azalda bilər.
Aerobik və güc məşqləri
Qaçış, velosiped sürmə və üzgüçülük kimi aerobik məşqlərin faydaları artıq uzun illərdir məlumdur. Böyük Britaniyanın NHS sistemi bildirir ki, bu fəaliyyətlər stressi azaldır, özünə inamı artırır və ürək xəstəlikləri, insult və 2-ci tip diabet riskini aşağı salır.
Lakin güc məşqlərinin ölüm riskinə təsiri indiyə qədər o qədər də aydın deyildi. İndi isə bu vəziyyət dəyişməyə başlayıb.
Ölüm riskində azalma
Tədqiqatçılar 30 ildən çox müddəti əhatə edən və 147,374 kişi və qadının iştirak etdiyi üç böyük araşdırmanın məlumatlarını analiz ediblər.
Nəticələr:
Həftədə 90 dəqiqə–2 saat ağırlıq məşqi edənlərdə:
Erkən ölüm riski 13% azalır
Ürək-damar xəstəliklərindən ölüm riski 19% aşağıdır
Demans kimi nevroloji xəstəliklərdən ölüm riski 27% azalır
Tədqiqatçılar həm aerobik, həm də güc məşqlərini birlikdə edən insanlarda ən aşağı risklərin müşahidə olunduğunu bildiriblər.
Ən aktiv qrupda (həftədə 2 saatdan çox aerobik məşq edənlərdə) erkən ölüm riski 58%-ə qədər azalır. Lakin həftədə 2 saatdan çox güc məşqi etməyin əlavə üstünlük vermədiyi də qeyd olunub.
Əzələ və beyin sağlamlığı
Şəxsi məşqçi Bev Wilson bildirib ki, ağırlıq məşqləri xüsusilə:
oynaq ağrıları
enerji azalması
yavaş metabolizm
çəki artımı
kimi problemləri olan insanlara kömək edir.
Onun sözlərinə görə, güc məşqləri:
qan şəkərini tənzimləməyə
oynaq ağrılarını azaltmağa
sümükləri gücləndirməyə
yardım edir.
Eyni zamanda, beyin sağlamlığına da müsbət təsir göstərir: diqqəti artırır, yaddaşı gücləndirir və idrak funksiyalarını yaxşılaşdırır.
Mənbə:TRT Haber
Hazırladı:Ziyalə Əhmədli
Gundelik.az
