Almaniyanın idman geyimləri istehsalçısı “Adidas AG” üçüncü rübdə rekord gəlir əldə edib.
Gundelik.az xəbər verir ki, şirkət xalis mənfəətini və gəlirini artıraraq tam illik proqnozunu təsdiqləyib.
İyul-sentyabr aylarında əməliyyatlardan əldə olunan xalis mənfəət 482 milyon avro, hər səhm üçün isə 2,57 avro təşkil edib. Bu, ötən ilin eyni dövründəki 469 milyon avro xalis mənfəət və hər səhm üçün 2,44 avro ilə müqayisədə artım deməkdir. Əməliyyat mənfəəti 23,1% artaraq 736 milyon avroya çatıb, əməliyyat marjası isə 11,1%-ə yüksəlib (ötən il 9,3%).
Oktyabrın ortalarında dərc edilən ilkin hesabatda bildirildiyi kimi, gəlir 3% artaraq rekord həddə – 6,63 milyard avroya çatıb. Məzənnə dəyişikliyinə görə artım 8%-dir. Ümumi marja 0,5 faiz bəndi yüksələrək 51,8%-ə çatıb.
Son rübdə məzənnə fərqləri nəzərə alınmadan ayaqqabı satışı 4%, geyim satışı 16%, aksesuar satışı isə 1% artıb. Coğrafi bölgələr üzrə satış artımı belə olub: Latın Amerikası – 20%, inkişaf etməkdə olan bazarlar – 11%, Avropa – 9%, Çin – 6%, Yaponiya və Cənubi Koreya – 6%, Şimali Amerika – 1%.
Şirkət cari il üçün təkmilləşdirilmiş gəlir proqnozunu təsdiqləyib və gəlirin təxminən 9% artacağını gözləyir. Tam illik əməliyyat mənfəəti isə təxminən 2 milyard avro səviyyəsində proqnozlaşdırılıb.
Çərşənbə günü Almaniyada ticarətin başlanğıcında Adidas səhmləri 1,6% ucuzlaşıb. Şirkətin bazar kapitallaşması ilin əvvəlindən 23,2% azalaraq 32,92 milyard avroya düşüb.
Gundelik.az