ABŞ 2026 Qış Olimpiya Oyunlarının sensasiyalı finalında Kanadanı 2-1 hesabı ilə məğlub edərək 46 ildən sonra ilk dəfə kişilər arasında Olimpiya buz xokkeyində qızıl medal qazandı. Qızıl medalın taleyini əlavə vaxtda Cek Hyuz həll etdi. ABŞ komandası oyun boyu dominant kanadalıların təzyiqinə dözdü və qapıçı Konnor Hellyabuk karyerasının ən yaxşı oyunlarından birini göstərdi. Bu, ABŞ kişilərinin 1980-ci ildə Leyk-Plasiddəki məşhur “Buz üzərində möcüzə”dən sonra ilk Olimpiya qızılıdır və eyni zamanda ABŞ-ın bu turniri ölkə xaricində qazandığı ilk qızıl medaldır. Milan-Kortina 2026-da ABŞ və Kanada arasında ikinci final idi, çünki qadınlar arasında da amerikalılar eyni hesabla əlavə vaxtda qalib gəlmişdi və kişilər də bu möhtəşəm dubli tamamladı. Oyunun əvvəlində balanslı mübarizə gedirdi, lakin ABŞ Mett Boldinin fərdi ustalığı sayəsində hesabı açdı: o, şaybanı öz yarımsahəsindən götürüb iki müdafiəçini keçdi və qapıçı Cordan Binninqtonu aldadaraq qol vurdu. Kanada əvvəlki pley-off oyunlarında olduğu kimi geri dönüş etməyə çalışdı, lakin yalnız ikinci periodun sonuna yaxın təzyiq qurmağa başladı. ABŞ müdafiədə möhkəm dayandı, hətta iki oyunçusu cərimə qutusunda olarkən 3-ə 5 vəziyyətində də. 38-ci dəqiqədə Devon Toews-un ötürməsindən sonra Ceyl Makar boş mövqedə şaybanı qapıya göndərərək hesabı bərabərləşdirdi. Üçüncü periodda Kanada üstün idi və əsas vaxtda 41 zərbə vurdu, ABŞ isə 26, lakin çoxlu qol imkanlarını qaçırdı. Hellyabuk Mitch Marnerin yaxın məsafədən zərbəsini möhtəşəm şəkildə dəf etdi, Nathan MacKinnon isə boş qapı qarşısında şaybanı kənara vurdu. ABŞ isə Brock Faberin zərbəsi dirəyə dəyərkən hesabı yenidən irəli çıxmağa yaxın idi. Oyun Olimpiya tarixində ilk dəfə qızıl medal matçında 3-ə 3 formatında əlavə vaxta getdi və 101-ci saniyədə dişi sınmış Cek Hyuz qol vuraraq Amerika idman tarixinə adını yazdı. Bu oyuna əlavə gərginlik NHL oyunçularının 2014-dən sonra ilk dəfə Olimpiadada iştirak etməsi ilə yanaşı siyasi fon da qatırdı: 2025-ci ildə ABŞ prezidenti Donald Trampın Kanadaya tariflər hədəsi və onu “51-ci ştat” adlandırması münasibətləri gərginləşdirmişdi. Tramp finalda iştirak etmədi, Kanada baş naziri Mark Karni isə oyunu Kvebekdə izləyirdi. Oyun sonrası Ağ Ev X hesabında Kanada qazına hücum edən qartal şəkli paylaşdı. Keçən ilki matçda ilk doqquz saniyədə üç dava olmuşdu, bu dəfə isə gərginlik tribunada hiss olunurdu və tamaşaçılar ABŞ komandasını fitə basırdı. Kanada üçün böyük zərbə kapitan Sidney Krosbinin diz zədəsi səbəbilə oynaya bilməməsi oldu və onun liderliyi çatışmadı. ABŞ isə bu Olimpiadada 12-ci qızıl medalını qazandı və medal cədvəlində ikinci oldu, Kanada isə 11-ci yerlə məyusedici nəticə göstərdi. Oyundan sonra ABŞ oyunçuları 2024-cü ildə sərxoş sürücünün vurması nəticəsində ölən keçmiş komanda yoldaşları Conni Qodronun formasını daşıyaraq onu yad etdilər.
Mənbə: BBC
Hazırladı: Ziyalə Əhmədli
Gundelik.az
