Fatemeh Şəms həftəsonu doğma ölkəsinin ABŞ və İsrail tərəfindən hərbi hücuma məruz qalmasını nəfəsini tutaraq izləyib.
2009-cu ildən bəri ABŞ-da yaşayan o, Tehrandakı rejimə uzaqdan müxalif olan iranlı-amerikalı mühacirlərdəndir və buna görə də şənbə günü bombardman zamanı İranın ali rəhbəri Ayətullah Əli Xameneinin ölümünə yas tutmur.
Filadelfiyada yaşayan Fatemeh BBC-yə deyib:
“Baş verənlərlə bağlı hamımızın hissləri çox qarışıqdır. Bir tərəfdən qatillərimizin artıq nəfəs almamasına görə son dərəcə xoşbəxtik.
[Xameneinin] 38 illik korrupsiya və cinayətlərdən sonra bir anın içində öldürülməsi bizə elə hiss etdirir ki, sanki uğrunda mübarizə apardığımız ədalət üzərində heç bir nəzarətimiz olmadı.”
O, ABŞ-dakı İran diasporunun qarışıq hisslər yaşayan yeganə üzvü deyil. Bəziləri ölənlərin sayı və münaqişənin nə qədər davam edəcəyi ilə bağlı narahatlıqlarını ifadə edib.
Lakin bir çoxları Boston, Vaşinqton və Los-Anceles kimi şəhərlərdə Xameneinin ölümünü qeyd etmək üçün toplaşıb.
Bazar günü Los-Ancelesdə — ABŞ-da yaşayan təxminən 400 min iranlı mühacirin üçdə birindən çoxunun yaşadığı və bəzən “Tehrangeles” adlandırılan şəhərdə — polis nümayişçilərin qeyd etməsi üçün federal bina qarşısındakı küçələri bağlayıb. İran-amerikalı izdiham bayraqlar dalğalandırıb, səmada dövrə vuran təyyarə isə arxasınca “THANK U TRUMP” (Sağ ol, Tramp) yazılmış banner daşıyıb.
Hoda Zeyqamnia üç uşağı ilə birlikdə küçələrdə rəqs edib — uşaqlardan biri ailə İrandan qaçarkən cəmi bir neçə günlük imiş.
Onun qızı Donya Çeşməğil BBC-yə deyib:
“Mən İranda doğulmuşam. Ailəmiz müsəlman olmadığımız üçün ölkədən qaçmağa məcbur oldu, çünki onlar müsəlman olmayanlara qarşı çox təzyiqçidirlər.
Ümid edirik ki, bu, rejim dəyişikliyinə gətirib çıxaracaq. ABŞ-ın nəhayət müdaxilə etməsinə görə çox minnətdarıq. İrandakı insanlar bunu istəyirdi. Bu, İrandakı insanların istədiyi şeydir.”
Onun bacısı Mona Çeşmhehil isə deyib:
“Bunun baş verməsi üçün bu qədər insanın həyatını itirməsinə heyfslənirəm, amma hazırda düşünə bildiyimiz tək şey — nəhayət geri dönmək, haradan gəldiyimizi görmək şansına sahib olmağımızdır. Belə bir şeyin baş verəcəyini heç təsəvvür etməzdik.”
Mənbə: BBC
Hazırladı: Ziyalə Əhmədli
Gundelik.az
