Türkiyənin Adıyaman şəhərində sentyabrın 28-də səhər saatlarında “Bazara gedirəm” deyərək evdən çıxan 16 yaşlı Elvan Yücetaşdan 11 gündür xəbər yoxdur. Telefonuna da zəng çatmayan yeniyetmənin ailəsi onun qaçırılmış ola biləcəyindən şübhələnir. Qızlarının həyatından narahat olan valideynləri Elvanı görən və ya harada olduğunu bilən hər kəsdən kömək istəyirlər.
Gundelik.az yerli mətbuata istinadən xəbər verir ki, Adıyamanda 16 yaşlı Elvan Yücetaşın 11 gündür itkin düşməsi ailəsini təşvişə salıb. Yeniyetmənin tapılması üçün axtarışlar davam edərkən ailəsi xoş xəbər gözləyir.
“Bazara gedirəm” dedi, bir daha geri qayıtmadı
Adıyaman şəhərinin Yeşilyurt məhəlləsində, 2194-cü küçənin yaxınlığında yaşayan Elvan Yücetaş sentyabrın 28-də səhər saatlarında bazara getmək üçün evdən çıxıb. Lakin saatlar keçməsinə baxmayaraq, yeniyetmə evə qayıtmayıb.
Günortadan sonra qızları ilə əlaqə saxlamağa çalışan Yücetaş ailəsi telefon zənglərinə də cavab ala bilməyib. Bundan sonra ailə 112 Təcili Çağrı Mərkəzinə itkin düşmə barədə məlumat verib. Müraciətdən sonra 16 yaşlı Elvanın tapılması üçün axtarışlara başlanılıb.
Ailəsi onun qaçırılmış ola biləcəyindən şübhələnir
Yıldız və Abdurrahman Yücetaş cütlüyünün dörd övladından biri olan Elvandan evdən çıxdığı gündən bəri heç bir xəbər alınmayıb. Yeniyetmənin telefonuna da zəng çatmaması ailəsinin narahatlığını daha da artırıb.
Qızlarının əvvəllər belə davranış sərgiləmədiyini bildirən valideynləri onun qaçırılmış ola biləcəyindən şübhələndiklərini deyiblər. Lakin Elvanın qaçırıldığına dair təsdiqlənmiş məlumat yoxdur.
Günlərdir qızlarından xəbər gözləyən ailə axtarışların nəticə verməsini və Elvana sağ-salamat qovuşmağı ümid edir.
Göz yaşları içində kömək çağırışı etdilər
Qızlarının həyatından narahat olduqlarını bildirən Yücetaş ailəsi aidiyyəti qurumlara və vətəndaşlara müraciət edib.
Ailə üzvləri bunları deyiblər:
“Qızımızın bir an əvvəl tapılmasını istəyirik. 11 gündür onun harada olduğunu bilmirik. Allah rizası üçün bizə kömək edin. Qızımızı görənlərin və ya harada olduğunu bilənlərin 112 Təcili Çağrı Mərkəzinə məlumat vermələrini istəyirik. Qızımızın həyatından narahatıq. Onun qaçırıldığını düşünürük. Hər kəsdən kömək gözləyirik. Qızımıza bir an əvvəl qovuşmaq istəyirik”.
Nuri
Gundelik.az
