Rusiyada ilin əvvəlindən etibarən ayı hücumları nəticəsində 10 ölüm hadisəsi qeydə alınıb.
Gündəlik.az xəbər verir ki, sağ qalma üzrə ekspert Dmitri Alyoşkin “Radio KP”nin efirində yırtıcıların yaşayış məntəqələrinə daha tez-tez yaxınlaşmasının səbəblərini açıqlayıb.
Onun sözlərinə görə, əsas amillərdən biri kənd əhalisinin azalmasıdır. İnsanların tərk etdiyi ərazilər vəhşi heyvanlar tərəfindən məskunlaşdırılır və bu da onların sayının artmasına səbəb olur.
Vəziyyəti yaşayış məntəqələrinin kənarlarında yaranan qanunsuz zibilliklər də daha da ağırlaşdırır. Ayılar hər cür qida ilə qidalana bildiyi üçün tullantılardan yeməyə tez öyrəşirlər. Ekspertin fikrincə, zibillikdən qida tapmaq onlar üçün ovlamaq və ya giləmeyvə toplamaqdan daha az enerji tələb edir.
Alyoşkin bildirib ki, ayı hücumlarını yalnız qida çatışmazlığı ilə izah etmək olmaz. Çünki oxşar hadisələr Rusiyanın müxtəlif bölgələrində baş verib.
Ekspert həmçinin ovçuluğun azalmasına diqqət çəkib. Onun sözlərinə görə, əvvəllər kənd yerlərində yaşayan insanların əksəriyyətinin silahı olub, hazırda isə xüsusi icazə olmadan vəhşi heyvanların ovlanması qadağandır.
Alyoşkin yaşayış məntəqələrinin yaxınlığında təhlükəli yırtıcıların sayına nəzarət edilməsinin vacibliyini vurğulayıb və tənzimlənən ovun mümkün variant kimi nəzərdən keçirilə biləcəyini deyib.
Ayı ilə qarşılaşdıqda nə etmək lazımdır?
Ekspertin tövsiyəsinə görə, ayı ilə qarşılaşdıqda insan öz varlığını sakit səslə bildirməli, vizual olaraq daha böyük görünmək üçün əllərini və ya çubuğu yuxarı qaldırmalı və heyvana arxasını çevirmədən yavaş-yavaş geri çəkilməlidir.
Qaçmaq isə qətiyyən tövsiyə edilmir. Ekspertin sözlərinə görə, qaçmaq heyvanın insanı təqib etməsinə səbəb ola bilər.
Sonuncu ayı hücumu barədə sentyabrın 17-də məlumat yayılıb. Hadisədən sağ çıxan yeganə şəxs kəndə çataraq baş verənlər barədə məlumat verib. Hadisə yerinə polis əməkdaşları göndərilib.
Nurəddin Abdullayev
Gündəlik.az
