Asiya bazarlarında Brent markalı xam neftin qiyməti təxminən 3% artaraq 115 dolları keçib.
Yaponiyanın Nikkei 225 fond birjası həftəni təxminən 4,5% azalma ilə açıb, Cənubi Koreyanın Kospi fond birjası isə 3,5% ucuzlaşıb.
Neftin qiyməti ötən həftəni 112 dollar civarında bağladı. ABŞ və İsrailin 28 fevralda İrana hücumundan sonra neft qiymətləri kəskin şəkildə yüksəldi. Cavab olaraq, İran dünyanın ən işlək neft daşıma marşrutlarından biri olan Hörmüz boğazını faktiki olaraq bağladı.
Dünya neftinin və mayeləşdirilmiş təbii qazın (LNG) təxminən 20%-i adətən bu boğazdan keçir. Buna görə də, müharibə ilə birlikdə qlobal yanacaq qiymətləri artmışdır.
Müharibədən əvvəl neftin bir barelinin qiyməti təxminən 72 dollar idi. Neftin qiyməti 9 martda rekord həddə – barel üçün 120 dollara çatdı, lakin ABŞ prezidenti Donald Trampın müharibənin sonunun yaxınlaşdığı barədə açıqlamalarından sonra düşdü. Ötən həftə Yaxın Şərqdə ABŞ və İran arasında danışıqlar qeyri-müəyyən olaraq qalsa da, həftəsonu Yəməndəki İranın dəstəklədiyi Husi üsyançıları müharibənin başlanğıcından bəri İsrailə ilk hücumlarını etdilər.
İrana qarşı hücumlar davam etdikcə, Tehran bölgədəki ABŞ universitetlərini, eləcə də ABŞ və İsrail rəsmilərinin evlərini hədəfə almaqla hədələyib.
ABŞ-ın bölgəyə 3500 əsgər göndərəcəyini açıqlaması gərginliyi daha da artırdı.
İran Parlamentinin spikeri Məhəmməd Bağır Qalibaf ölkəsinin silahlı qüvvələrinin “Amerika əsgərlərinin enişini gözlədiyini və onlara atəş açacağını” bildirib.
Tramp: “İran neftini ala bilərik”
ABŞ prezidenti Donald Tramp bazar günü Financial Times (FT) qəzetinə verdiyi müsahibədə “İran neftini ələ keçirmək istədiyini” bildirib və İranın neft ticarətinin mərkəzi olan Xarq adasını ələ keçirə biləcəklərinə işarə edib.
Tramp deyib: “Düzünü desəm, ən çox istədiyim şey İrandan neft almaqdır, amma ABŞ-dakı bəzi axmaq insanlar soruşurlar ki, niyə belə edirsiniz? Amma onlar axmaq insanlardır”.
İranın bölgədəki müdafiə imkanları ilə bağlı suala Tramp belə cavab verib: “Düşünmürəm ki, onların müdafiə gücü var; biz buranı asanlıqla ələ keçirə bilərik”.
Tramp bu potensial addımı Venesuelada etdikləri ilə müqayisə etdi. Yanvar ayında ABŞ Venesuela lideri Nikolas Maduronu həbs etdikdən sonra Venesuelanın neft sektoruna “qeyri-müəyyən müddətə” nəzarəti ələ keçirdiyini açıqladı
Mənbə:BBC
Tərtib etdi:Səid Mikayılzadə
Gundelik.az
