The Guardian qəzetinin məlumatına görə, Daxili İşlər Nazirliyi yeni ildə ilk sığınacaq axtaran qrupunu Şərqi Sasseksdə yerləşən hərbi obyektə göndərməyi planlaşdırır.
Whitehall-da aparılan müzakirələr çərçivəsində, sığınacaq axtaranlar üçün otellərdən istifadəyə son qoymaq məqsədilə Crowborough hərbi təlim düşərgəsinin bir neçə həftə ərzində istifadəyə verilməsi nəzərdən keçirilir.
Bu müzakirələr yerli sakinlərin qəzəbli etirazlarına, eləcə də bələdiyyə və bir icma qrupunun hüquqi addımlar atmaq təhdidlərinə baxmayaraq davam edir.
Leyboristlər Partiyasının lideri Keir Starmer ən gec 2029-cu ilə qədər – növbəti seçkilərə qədər – sığınacaq axtaranların otellərdə yerləşdirilməsinə son qoyulacağına söz verib. Lakin son vaxtlar bu kateqoriyaya aid insanların sayı artıb. Daxili İşlər Nazirliyinin məlumatına görə, sentyabr ayında sığınacaq müraciətlərinə qərar gözləyən və müvəqqəti yerləşdirilən insanların sayı 36 273 nəfər olub ki, bu da iyun ayı ilə müqayisədə 13% artım deməkdir.
Daxili İşlər Nazirliyi konkret yerləşdirmə məkanları ilə bağlı şərh verməkdən imtina etsə də, nazirlər Crowborough kazarmasında 540 nəfər kişi sığınacaq axtaranın yerləşdirilməsində israrlıdırlar.
Crowborough nazirlər tərəfindən müəyyən edilən iki hərbi düşərgədən biridir və ümumilikdə 900 nəfərin yerləşdirilməsi planlaşdırılır. Digər düşərgə isə İnvernessdə yerləşir.
Rəsmilər əvvəlcə sığınacaq axtaranları dekabrın ilk həftəsində Şərqi Sasseksdəki kazarmaya köçürməyi planlaşdırırdılar, lakin obyektin təhlükəsizliyinə əmin olmaq və Bibby Stockholm barjasında legionella bakteriyasının aşkarlandığı kimi qalmaqallı vəziyyətin qarşısını almaq üçün bu qərarı təxirə salıblar.
16 dekabr tarixində Daxili İşlər Nazirliyi Wealden rayon şurasına məktub göndərərək Crowborough ilə bağlı hələ yekun qərarın verilmədiyini bildirib. Şuraya sığınacaq axtaranların göndərilməsindən ən azı bir həftə əvvəl xəbərdarlıq ediləcəyi vəd olunub.
Məlumata görə, nazirlər və rəsmi şəxslər artıq yanvar ayında ilk insanların gəlişi üçün hazırlıqlara başlayıblar.
Crowborough-un cənub sahillərinə yaxınlığı səbəbindən, əsasən kiçik qayıqlarla ölkəyə yeni gələn kişilərin burada yerləşdirilməsi planlaşdırılır.
Yerli mənbələr son günlər düşərgə ərazisində müəyyən hərəkətlilik olduğunu və Daxili İşlər Nazirliyinin əməkdaşlarının ərazidə göründüyünü bildiriblər.
Sakinlərdən ibarət bir qrup hərbi bazanın istifadəsinə qarşı məhkəmə nəzarəti (judicial review) üçün 50 min funt sterlinqdən çox vəsait toplayıb.
Sakinlər iddia edirlər ki, Crowborough ətrafında yüzlərlə, əsasən gənc kişinin axınına tab gətirəcək infrastruktur və imkanlar mövcud deyil. Bu şəxslərin bazanı sərbəst tərk edib geri qayıda biləcəyi bildirilir.
Təxminən 3 min nəfər bazanın qarşısında keçirilən etiraz aksiyalarına qatılıb. Wealden rayon şurası Daxili İşlər Nazirliyinin zəif ünsiyyətini və ictimaiyyətlə əlaqənin olmamasını “dəhşətli” adlandıraraq bunun qorxu və dezinformasiyaya yol açdığını bildirib.
Şura nümayəndəsi deyib:
“Əgər hüquqi cəhətdən mümkün olarsa, düşərgənin istifadəsi ilə bağlı istənilən qərara etiraz edəcəyik və bu məqsədlə iki aparıcı barristerə müraciət etmişik.
Daxili İşlər Nazirliyinə qarşı addımlarımız çərçivəsində artıq onlara planlaşdırma qaydalarının pozulması ilə bağlı rəsmi bildiriş təqdim etmişik.”
Rəsmilər yerli sakin qrupları və bəziləri ifrat sağ təşkilatlarla əlaqəli olan anti-miqrant qruplar tərəfindən gözlənilən etirazlara qarşı da hazırlıq görüblər.
Daxili İşlər Nazirliyinin sözçüsü isə bildirib:
“Biz qeyri-qanuni miqrasiya və sığınacaq otellərinin səviyyəsindən qəzəblənirik. Bu hökumət bütün sığınacaq otellərini bağlayacaq. Daha uyğun məkanların istifadəyə verilməsi istiqamətində işlər artıq sürətlə davam edir ki, icmalar üzərindəki təzyiq azaldılsın və xərclər aşağı salınsın.
Biz yerli hakimiyyət orqanları, tərəfdaşlar və hökumət daxilində sıx əməkdaşlıq edərək bu prosesi sürətləndiririk.”
Mənbə: The Guardian
Hazırladı: Ziyalə Əhmədli
Gundelik.az