Yay aylarında kondisioner istifadəsinin artması ciddi ağciyər infeksiyası riskini də artırır. Baxımsız kondisioner və su sistemlərində çoxalan bakteriyalar “leqioner xəstəliyi”nə səbəb ola bilər. Xəstəlik erkən aşkar edilməzsə, ağır sətəlcəmə və hətta həyati təhlükəyə gətirib çıxara bilər.
Yay mövsümünün başlaması ilə qapalı məkanlarda kondisioner istifadəsi artıb və bu, sağlamlıq baxımından vacib bir riski yenidən gündəmə gətirib. Təmizliyi mütəmadi aparılmayan kondisioner və su sistemlərində çoxalan bakteriyalar nəfəs yolu ilə ağciyərlərə keçərək ciddi infeksiyalara səbəb ola bilir. Mütəxəssislər xüsusilə risk qrupunda olan şəxslərin diqqətli olmasının vacibliyini və erkən diaqnozun həyati əhəmiyyət daşıdığını vurğulayır.
Yay aylarında kondisioner istifadəsinin artması ilə birlikdə mühüm bir sağlamlıq riski yenidən gündəmə gəlib. Düzgün baxımı aparılmayan kondisioner və su sistemlərində yaranan Legionella pneumophila bakteriyası nəfəs yolu ilə orqanizmə daxil olduqda ağır gedişli ağciyər iltihabına səbəb olur.
Uzm. Dr. Barış Mustafa Poyraz bildirib ki, leqioner xəstəliyi bir çox insan tərəfindən sadə qrip və ya soyuqdəymə kimi qəbul edildiyi üçün gec diaqnoz olunur. Onun sözlərinə görə, xəstəlik ilkin mərhələdə hərarət, əzələ ağrısı, öskürək və nəfəs darlığı ilə özünü göstərir, lakin zamanla ağır sətəlcəmə çevrilə bilər və müalicə olunmadıqda həyati təhlükə yaradır.
Həkim qeyd edib ki, xəstəliyin mənbəyi əsasən kondisionerlər, duş başlıqları, jakuzilər və soyutma sistemlərindəki durğun və ilıq sudur. Baxımsız sistemlər legionella bakteriyası üçün ideal mühit yaradır.
Xəstəlik hər yaşda insanı təsir edə bilər, lakin bəzi qruplar daha yüksək risk altındadır. 50 yaşdan yuxarı şəxslər, siqaret çəkənlər, xroniki ağciyər və ya ürək xəstəliyi olanlar, eləcə də immun sistemi zəif olanlar bu xəstəliyə qarşı daha həssasdır. Bu səbəbdən mərkəzi kondisioner sistemlərinin olduğu otel, xəstəxana, ticarət mərkəzləri və ictimai nəqliyyat kimi yerlərdə xüsusilə diqqətli olmaq lazımdır.
Simptomlar yarandıqda vaxt itirmədən həkimə müraciət etmək vacibdir. Yüksək hərarət, titrəmə, güclü öskürək və nəfəs darlığı birlikdə müşahidə olunarsa, dərhal tibbi yardım alınmalıdır. Leqioner xəstəliyi antibiotiklə müalicə oluna bilir, lakin gecikmə xəstənin vəziyyətini ciddi şəkildə pisləşdirir.
Diaqnoz üçün ağciyər rentgeni və sidik antigen testi kimi sadə üsullar kifayət edir. Erkən diaqnoz həm xəstəni, həm də ətrafdakı insanları qorumaqda mühüm rol oynayır.
Mənbə:CNN Türk
Hazırladı:Ziyalə Əhmədli
Gundelik.az
