Yahoo axtarış sahəsində yenidən gündəmə qayıdır. Şirkət Yahoo Scout adlı yeni süni intellekt əsaslı “cavab mühərriki”ni təqdim edib. Bu sistem Google-un AI rejimi və Perplexity ilə rəqabət aparmaq istəyir və bunu gözlənilməz şəkildə daha “klassik” yanaşma ilə edir. Scout linkləri düymələrin və ya qeydlərin arxasında gizlətmək əvəzinə, onları birbaşa ön plana çıxarır və istifadəçini mənbələrə keçməyə təşviq edir.
Scout “AI çatbotu” kimi yox, “answer engine” (cavab mühərriki) kimi təqdim olunur. İstifadəçi sual verir və aydın, danışıq üslubunda cavab alır, amma cavabın içində görünən mavi linklər çox olur. Bir sorğu üçün doqquza qədər mənbə göstərilə bilər, üstəlik məlumatın haradan götürüldüyünü göstərən tam siyahı da əlavə olunur. Yahoo bunun məqsədli olduğunu bildirir: rəqiblər daha “hamar” xülasələrə fokuslandığı halda, Scout interneti görünməz etmədən, vebi ön planda saxlamağı hədəfləyir. Bu yanaşma, Google-un AI axtarışının səssiz şəkildə saytların trafikini azaltması ilə bağlı nəşriyyatların narahatlıqlarına da cavab kimi görünür.
Yahoo Scout bu gündən etibarən ABŞ istifadəçiləri üçün beta mərhələsində istifadəyə verilir. Xidmətə həm scout.yahoo.com saytından, həm də iOS və Android üçün Yahoo Search tətbiqi daxilindən giriş mümkündür.
Texniki tərəfdən Scout Anthropic şirkətinin Claude modeli əsasında işləyir və Yahoo-nun öz məlumat bazası, üslubu və geniş məzmun kitabxanası ilə birləşdirilir. Buraya Yahoo News, Finance, Sports və digər bölmələr daxildir. Veb nəticələri isə Microsoft Bing tərəfindən təmin olunur.
Nəticə Perplexity və Google-un AI rejiminə bənzəsə də, təqdimat fərqlidir: burada linklər əsas hissədir, əlavə detal kimi yox. İnterfeys də “çox danışan köməkçi”dən çox, seçilmiş mənbələrlə bələdçi təsiri yaradır.
Bu yanaşmanın biznes tərəfi də var. Yahoo-nun Google kimi böyük axtarış reklam sistemi olmadığı üçün AI cavablarına daha sərbəst yönələ bilir və əsas gəlir mənbəyini itirməkdən o qədər narahat deyil. Yahoo-nun CEO-su Jim Lanzone The Verge-ə bildirib ki, Scout gələcəkdə ənənəvi Yahoo Search-u tam əvəzləyə bilər. Şirkət artıq bu xidməti nəticələrin altında yerləşdirilən reklamlar və affiliate linklər vasitəsilə monetizasiya edir.
Perplexity və Google-un AI rejimi ilə müqayisədə Scout daha az “AI yoldaş” rolundadır. Daha çox məqsədi sürətli və praktik şəkildə etibarlı məlumat tapmaqdır. Yahoo düşünür ki, AI xülasələrinin artdığı bir dövrdə insanları açıq şəkildə mənbələrə yönəltmək bəlkə də ən fərqli və “radikal” addımdır.
Mənbə: Digital Trends
Hazırladı: Ziyalə Əhmədli
Gundelik.az