SpaceX-in səhmləri, böyük həcmli ilkin kütləvi təklifdən (IPO) cəmi 10 gün sonra bazar ertəsi günü 16% dəyər itirərək 12 iyunda qeydə alınan açılış qiymətinin altına düşüb. Bu enişlə birlikdə, tarixdə ən böyük IPO-lardan birini həyata keçirən şirkətin səhmləri ardıcıl üçüncü ticarət gününü də zərərlə bağlayıb.
Bazar məlumatlarına görə, SpaceX səhmlərinin bazar ertəsi günü bağlanış qiyməti 154,60 dollar olub.
Bu vəziyyət, IPO-dan sonra açıq bazardan səhm alan fərdi investorların qazancının böyük hissəsinin əriməsinə səbəb olub.
Nasdaq Composite-da 12 iyunda 160,90 dollardan ticarətə başlayan səhmlər 16 iyunda 201,80 dollarla zirvəyə çatmışdı. Bazar ertəsi bağlanışına görə isə səhmlər bir həftə əvvəlki pik nöqtədən təxminən 23% geriləyib.
IPO prosesi zamanı SpaceX və şirkətin IPO öncəsi səhmdarları 85 milyard dollardan çox gəlir əldə edib. Kəskin enişə baxmayaraq, SpaceX təxminən 2 trilyon dollarlıq bazar dəyəri ilə Walmart və Meta kimi nəhəngləri geridə qoyaraq dünyanın ən dəyərli şirkətlərindən biri olaraq qalır.
Texnologiya səhmlərində ümumi eniş və istiqraz narahatlığı
SpaceX-dəki satış dalğası texnologiya sektorundakı ümumi enişlə eyni dövrə təsadüf edib. Bazar ertəsi günü Alphabet son bir ilin ən zəif gündəlik performansını göstərib.
S&P 500 0,43%, texnologiya yönümlü Nasdaq Composite isə 1,3% dəyər itirib. ABŞ ilə İran arasındakı danışıqlarda irəliləyiş fonunda neft qiymətləri də mart ayından bəri ən aşağı səviyyəyə enib.
Lakin bu vəziyyət, süni intellekt infrastrukturunu maliyyələşdirmək üçün böyük borclanma edən iri texnoloji şirkətlərin borc yükünün qısa müddətli inflyasiya ilə artacağı narahatlığını aradan qaldırmayıb.
Bloomberg-in bazar ertəsi yaydığı hesabatda SpaceX-in istiqraz satışı vasitəsilə ən az 20 milyard dollar vəsait cəlb etmək istədiyi bildirilib.
Jose Torres (Interactive Brokers-in baş iqtisadçısı) müştərilərə göndərdiyi qeyddə bildirib ki, bu addım texnoloji layihələrin maliyyələşdirilməsi üçün yüksək nağd ehtiyacın yaratdığı narahatlıqları artırır.
Bazar ertəsi ümumi satış təzyiqi nəticəsində Amazon, Chipotle, McDonald’s, Home Depot və Netflix kimi iri istehlak yönümlü şirkətlərin səhmləri də mənfi təsirə məruz qalıb.
Mənbə:TRT Haber
Hazırladı:Ziyalə Əhmədli
Gundelik.az
