“Artıq səbrimiz tükənib,” – deyə müdafiə naziri Xavaca Məhəmməd Asif hücumlardan sonra bildirib.Zərbələr Əfqanıstan Talibanının cümə axşamı gecəsi sərhəd yaxınlığında Pakistan hərbi postlarına qarşı genişmiqyaslı hücum elan etməsindən sonra baş verib.Son hücumlar iki qonşu ölkə arasında aylardır davam edən toqquşmaların davamıdır. Oktyabrda kövrək atəşkəs razılaşdırılsa da, danışıqlar tam və davamlı sülh sazişi ilə nəticələnməyib. Hər iki tərəf danışıqlara ciddi yanaşmamaqda bir-birini ittiham edir.Taliban bildirib ki, “cavab əməliyyatı” yerli vaxtla saat 20:00-da başlayıb. Onların iddiasına görə, 19 Pakistan hərbi postu və iki baza ələ keçirilib, 55 pakistanlı əsgər öldürülüb. BBC bu iddiaları təsdiqləyə bilməyib.Pakistan isə Talibanın şimal-qərbdəki Xayber Paxtunxva əyalətində sərhəd boyunca “təxribatçı və əsassız atəş açdığını” bildirib və buna “dərhal və effektiv cavab” verildiyini açıqlayıb.Bundan sonra Pakistan cümə günü səhər tezdən Əfqanıstana qarşı bombardman həyata keçirib. Kabil, Qəndəhar və Paktika şəhərlərində hədəflər vurulub. Bu şəhərlərin hamısı 2 600 km uzunluğunda dağlıq Pakistan–Əfqanıstan sərhədi yaxınlığındadır.Pakistan ordusunun sözçüsü Əhməd Şərif Çaudri 22 Əfqan hərbi hədəfin vurulduğunu və 200-dən çox Taliban döyüşçüsünün öldürüldüyünü bildirib. O, həmçinin 12 pakistanlı əsgərin həlak olduğunu deyib.Taliban sözçüsü Mücahid isə yalnız 13 Taliban döyüşçüsünün öldüyünü, 22 nəfərin yaralandığını iddia edib. Onun sözlərinə görə, 13 mülki şəxs yaralanıb, ölən mülki şəxslərin sayı isə dəqiqləşməyib. BBC bu rəqəmləri də təsdiqləyə bilməyib.Toqquşmalar zamanı hər iki tərəf qarşı tərəfə ağır itkilər verdiyini, özlərinin isə az zərər gördüyünü iddia edir.Taliban sözçüsü Zəbihullah Mücahid əvvəlcə X sosial şəbəkəsində Pakistanın Qəndəhar və Helmanddakı hərbi mövqelərinə zərbələr endirildiyini yazsa da, sonradan paylaşımı silib.Taliban cümə səhəri Pakistan ərazisində bir neçə hədəfə hava zərbələri endirdiyini bildirib. Taliban hökumətindəki mənbələr BBC-yə deyiblər ki, bu hücumlar Əfqanıstandan buraxılan dronlarla həyata keçirilib.Pakistanın informasiya naziri Atta Tarar isə bildirib ki, Pakistan ordusu Swabi, Nowshera və Abbottabad şəhərlərinə yönəlmiş Əfqan dronlarının qarşısını alıb. Abbottabad şəhərində Pakistan ordusunun hərbi akademiyası yerləşir.Pakistanın baş naziri Şahbaz Şərif deyib ki, ölkəsinin qüvvələri “istənilən təcavüzkar niyyətləri darmadağın etmək gücünə malikdir” və “əziz vətənin müdafiəsində heç bir güzəşt olmayacaq”.Əfqanıstanda isə Taliban rəsmiləri iddia ediblər ki, Pakistan raketləri Nangarharda – Pakistandan yeni gəlmiş əfqan qaçqınların yerləşdiyi düşərgəyə düşüb və azı doqquz nəfər yaralanıb. BBC bu məlumatı da təsdiqləyə bilməyib.Zərbələrə baxmayaraq, vurulan Əfqan şəhərlərində sakinlər və yerli rəsmilər BBC-yə bildiriblər ki, vəziyyət nisbətən sakitləşib, lakin sərhədin hər iki tərəfində yüksək hazırlıq vəziyyəti davam edir.Pakistanın xarici işlər naziri İshaq Dar Türkiyənin xarici işlər naziri Hakan Fidanla telefon danışığı aparıb və tərəflər vəziyyətlə bağlı sıx əlaqədə qalmağa razılaşıblar, sülh və sabitliyin vacibliyini vurğulayıblar.Dar hazırda Səudiyyə Ərəbistanında rəsmi səfərdədir və bu ölkənin xarici işlər naziri Faysal bin Fərhan Əl Səudla da oxşar məzmunda danışıq aparıb.İran isə Pakistan və Əfqanıstan arasında dialoqa vasitəçilik etməyi təklif edib və tərəfləri fikir ayrılıqlarını “yaxşı qonşuluq və dialoq yolu ilə” həll etməyə çağırıb.Böyük Britaniyanın xarici işlər naziri İvette Kuper də tərəfləri danışıqlara qayıtmağa, “gərginliyi dərhal azaltmağa və mülki şəxslərə əlavə zərərdən qaçmağa” çağırıb.Pakistan uzun müddətdir ki, Əfqanıstandakı Taliban hökumətini “Pakistana qarşı terrorçuları” dəstəkləməkdə ittiham edir və ölkədə, o cümlədən paytaxtdakı məsciddə baş vermiş intihar hücumlarına görə onları günahlandırır.
Tərtib etdi:Jalə Əliyeva
Mənbə:BBC
Gundelik.az
