Türkiyə Milli Kəşfiyyat Təşkilatı (MİT) və Suriya Kəşfiyyat Xidməti tərəfindən birgə həyata keçirilən əməliyyatda ələ keçirilən İŞİD yaraqlılarından biri də 10 oktyabr Ankara dəmir yolu stansiyasında baş verən qətliamla əlaqəli olduğu iddia edilən Ömər Dəniz Dündardır.
Türkiyə Milli Kəşfiyyat Təşkilatının (MİT) Suriyada keçirdiyi əməliyyat nəticəsində qırmızı bülletenlə axtarışda olan İraq və Şam İslam Dövləti (İŞİD) terror təşkilatının 10 üzvü Türkiyəyə gətirilərək saxlanılıb. Evrensel qəzetinin verdiyi məlumata görə, Türkiyə Milli Kəşfiyyat Təşkilatının (MİT) Suriya Kəşfiyyat Xidməti ilə əməkdaşlıq çərçivəsində həyata keçirdiyi əməliyyatda tutulan şəxslərdən biri 10 oktyabr Ankara dəmir yolu stansiyasında baş verən qırğınla əlaqəli olduğu iddia edilən Ömər Dəniz Dündardır.
10 oktyabr 2015-ci ildə DİSK, KESK, TMMOB və TTB kimi vətəndaş cəmiyyəti təşkilatları tərəfindən təşkil edilən “Əmək, Sülh və Demokratiya Mitinqi”ndən əvvəl toplaşan izdihama qarşı törədilən bombalı hücum nəticəsində 109 nəfər həlak olub, 500-dən çox vətəndaş yaralanıb.
Dündarın 2014-cü ildə İŞİD-ə qoşulmaq üçün Suriyaya getdiyi, orada bir çox münaqişələrdə iştirak etdiyi və təşkilatın Türkiyəyə qarşı həyata keçirdiyi çoxsaylı hücumlarla əlaqəli olduğu müəyyən edilib. Bundan əlavə, Dündarın barmaq izlərinin keçmiş hücumlarda istifadə edilən bomba cihazlarında tapıldığı bildirilib. Saxlanılan digər İŞİD üzvlərinin də keçmişdə Türkiyədə törədilən çoxsaylı hücumlarda iştirak etdikləri deyilir.
Əsir götürülən yaraqlılar arasında İŞİD-in Türkiyə üzrə məsul “kəşfiyyat əmiri” olduğu deyilən Əli Bora da var. Boranın 2014-cü ildə İŞİD-ə qoşulmaq üçün Suriyaya getdiyi, təşkilat daxilində müxtəlif bölmələrdə xidmət etdiyi və çoxsaylı münaqişələrdə iştirak etdiyi bildirilir.
Mənbə:Euronews
Tərtib etdi:Jalə Əliyeva
Gundelik.az
