Geyilə bilən texnologiyalar moda anlayışını yenidən formalaşdırır. Artıq geyimlərdə yalnız estetik görünüş deyil, sağlamlıq, funksionallıq və davamlılıq da ön plana çıxır. Bu yeniliklər sürətli modanın ətraf mühitə vurduğu zərərin azaldılmasına da töhfə verir.
Moda dünyası artıq təkcə gözəl görünməklə məhdudlaşmır. Geyilə bilən texnologiyalar estetikliyi həyat keyfiyyətini artıran innovasiyalarla birləşdirərək modanı tamamilə yeni mərhələyə daşıyır. Müasir geyimlər bədən temperaturunu izləyə, sağlamlıq göstəricilərini nəzarətdə saxlaya və fiziki performansı artırmağa kömək edə bilir. Eyni zamanda bu tendensiya moda sənayesinin əsas problemlərindən biri olan sürətli modaya alternativ kimi qiymətləndirilir.
Modanın gələcəyi ilə bağlı 25 ildən artıq təcrübəyə malik, həmçinin Türkiyə Silahlı Qüvvələri üçün də geyimlər hazırlayan dizayner Arzu Kaprolun fikirlərinə yer verilib.
Yeni nəsil parçalar: Özünü bərpa edən davamlı materiallar
Özünü bərpa edə bilən parçalar moda sənayesində inqilabi yenilik hesab olunur. Yanğına və kəsilməyə davamlı, hətta zədələndikdən sonra özünü bərpa edən materiallar gələcəyin geyimlərini formalaşdırır. Bu cür parçalar geyimlərin istifadə müddətini uzatmaqla yanaşı, ətraf mühitin qorunmasına da töhfə verir.
Arzu Kaprol deyir:
“Təmiz zülal liflərindən hazırlanan parçalar kəsildikdə özünü bərpa edə bilir. Bu texnologiya həm geyimlərin ömrünü uzadır, həm də istifadəçiyə və ətraf mühitə fayda verir. Gələcəkdə geyiminizə toxunaraq musiqi yaratmaq və onu musiqi aləti kimi istifadə etmək mümkün olur. Hətta bir yastıq ümumi isitmə sistemindən daha qənaətli şəkildə ətrafı qızdıra bilən texnologiyalarla təchiz edilir.”
Çətin şərait üçün hazırlanmış ağıllı geyimlər
Geyilə bilən texnologiyalar ekstremal şəraitdə çalışan insanlar üçün də geniş imkanlar yaradır. Arzu Kaprolun Antarktidada fəaliyyət göstərən türk alimləri üçün hazırladığı xüsusi geyimlər bunun uğurlu nümunəsidir.
Bu geyimlər bədən temperaturunu izləyir və zərurət yarandıqda isitmə funksiyasını işə salır. Belə innovasiyalar sərt təbiət şəraitində insanların təhlükəsizliyini və həyatını qorumağa kömək edir.
Kaprol bildirir:
“Antarktidada müxtəlif iqlim şəraitində çalışan türk alimlərinin daha keyfiyyətli geyimlərdən istifadə etməsini təmin etmək, onları yalnız soyuqdan qorumaq deyil, həm də həyati göstəricilərini izləmək, fövqəladə hallarda bədəni isitmək və bütün bu texnologiyaları Türkiyədə hazırlamaq bizim üçün böyük əhəmiyyət daşıyır.”
Sürətli moda dövrü başa çatır?
Tekstil sənayesi dünyada ətraf mühitə ən çox zərər vuran sahələrdən biridir. Sürətli moda səbəbindən cəmi bir neçə dəfə geyinilən milyonlarla geyim həm resursların israfına, həm də ekoloji problemlərin artmasına səbəb olur.
Geyilə bilən texnologiyalar isə daha davamlı gələcək vəd edir. Artıq geyimlər yalnız estetik görünüş üçün deyil, daha uzunömürlü, funksional və ekoloji baxımdan məsuliyyətli şəkildə hazırlanır.
Arzu Kaprol qeyd edir:
“Sürətli moda çərçivəsində istehsal olunan geyimlər orta hesabla cəmi beş dəfə istifadə olunmaq üçün hazırlanır. Məsələn, istehsalına təxminən 2 min litr təmiz su sərf edilən ağ köynəyi cəmi beş dəfə geyinirsinizsə, bunun ətraf mühitə vurduğu zərəri ödəmək mümkün deyil. Xoşbəxtlikdən bu sahədə dəyişiklik artıq başlayıb. Moda təbiəti məhv etmək məcburiyyətində deyil. Geyilə bilən texnologiyalar sayəsində daha az resurs sərf etməklə daha funksional və uzunömürlü geyimlər hazırlamaq mümkündür. Bu, modanın gələcəyi üçün mühüm addımdır.”
Mənbə:TRT Haber
Hazırladı:Ziyalə Əhmədli
Gundelik.az
