Stanford Universitetində tədqiqatçılar iflic olan insanlara yalnız düşüncə vasitəsilə ünsiyyət qurmağa imkan verən yeni beyin-kompüter interfeysi (BCI) hazırlayıblar. Araşdırmalar göstərir ki, bu texnologiya daxili səsi 74 faiz dəqiqliklə deşifrə edə bilir və təhlükəsizlik məqsədilə parol sistemi ilə idarə olunur.
Beynin nitq siqnallarını oxuyan texnologiya
ABŞ-nin Stanford Universitetində aparılan araşdırmalar sübut edib ki, BCI yalnız nitq cəhdlərini deyil, həm də insanın qəsdən düşündüyü sözləri oxuya bilir.
Gundelik.az xəbər verir ki, nəticələr “Cell” jurnalında dərc olunub.
Layihənin əsas məqsədi nitq qabiliyyətini itirmiş şəxslərə – xüsusilə də ALS və beyin sapı iflicindən əziyyət çəkən xəstələrə – yalnız düşüncədən istifadə etməklə ünsiyyət imkanı yaratmaqdır. Tədqiqatçı Erin Kunz bildirib:
“İlk dəfə olaraq biz nitq haqqında düşünəndə beynin necə fəaliyyət göstərdiyini anlamağa başladıq”.
Beyinə yerləşdirilən mikroelektrodlar
Tədqiqatda danışa bilməyən dörd iştirakçının motor korteksinə mikroelektrodlar implantasiya edilib. İştirakçılardan bəziləri sözləri səsləndirməyə çalışıb, digərləri isə sadəcə onlar haqqında düşünüb. Bu müddət ərzində alimlər beyin siqnallarını qeydə alaraq süni intellektin köməyi ilə təhlil ediblər.
74 faizlik nəticə və parol sistemi
Sınaqlar zamanı sistem 125 min sözdən ibarət lüğət bazasından cümlələri 74 faiz dəqiqliklə müəyyənləşdirə bilib. Təhlükəsizlik məqsədilə alimlər parolla idarə olunan xüsusi sistem hazırlayıblar ki, bu da arzuolunmaz daxili səslərin oxunmasının qarşısını alır.
Məsələn, istifadəçi yalnız əvvəlcədən təyin olunmuş ifadəni – “Chitty chitty bang bang” – düşündüyü zaman cihaz aktivləşib. Bu parol 98 faizdən çox dəqiqliklə tanınıb.
Gələcəkdə ünsiyyət imkanları
Tədqiqatçı Frank Willett bildirib ki, yeni texnologiya yaxın gələcəkdə iflic olan insanlara “təbiiliyə yaxın nitq və ünsiyyət” imkanı yarada bilər.
Gundelik.az
