Rəsmi məlumatlara görə, ilin ilk üç ayında ümumi daxili məhsul (ÜDM) ötən ilin eyni dövrü ilə müqayisədə 5% artıb. İqtisadçılar isə bu rəqəmin təxminən 4.8% olacağını gözləyirdilər.
Bu artım, 28 fevralda başlayan və qlobal enerji təchizatını ciddi şəkildə pozan Yaxın Şərq münaqişəsinə baxmayaraq baş verib. Xüsusilə Asiya ölkələri bu vəziyyətdən daha çox təsirlənib.
Bu, həm də Pekinin ötən ay illik iqtisadi artım hədəfini 4.5%-5% aralığına endirməsindən sonra açıqlanan ilk ÜDM göstəricisidir. Bu, 1991-ci ildən bəri ən aşağı artım hədəfidir.
Əvvəlki rübdə 4.5% olan zəif artımdan sonra baş verən bu yüksəliş əsasən istehsal sektorunun hesabına olub. Bununla belə, daşınmaz əmlak sektorundakı investisiyaların azalması iqtisadiyyata mənfi təsir göstərməkdə davam edir.
Avtomobil və digər ixrac məhsulları iqtisadi göstəricilərdə “əsas müsbət məqam” kimi qiymətləndirilir.
Ekspertlər bildirir ki, İran müharibəsinin tam təsirləri hələ görünməyib və növbəti rübdə ticarət pozuntuları səbəbindən ÜDM-in zəifləməsi ehtimal olunur.
Çinin son iqtisadi hədəfləri mart ayında açıqlanıb. Hökumət innovasiya, yüksək texnologiyalar və daxili istehlakı artırmaq üçün böyük investisiyalar etməyi planlaşdırır.
Hakim Kommunist Partiyası iqtisadiyyatı yenidən formalaşdırmağa çalışır. Ölkə hazırda zəif istehlak, əhalinin azalması və uzun müddətli daşınmaz əmlak böhranı kimi problemlərlə üzləşir.
Beynəlxalq səviyyədə isə Çin enerji çatışmazlığı və ABŞ-la ticarət gərginliyi ilə qarşılaşır. ABŞ prezidenti Donald Trump tərəfindən tətbiq edilən tariflər də bu vəziyyətə təsir edir.
Hazırda Çin mallarının çoxuna 10% ABŞ tarifi tətbiq olunur. ABŞ maliyyə naziri bildirib ki, bu rüsumlar iyul ayına qədər əvvəlki səviyyəyə qaytarıla bilər.
Xi Jinping ilə Trampın may ayında Çində görüşməsi gözlənilir.
Mart ayı üzrə ixrac məlumatlarına görə, artım kəskin şəkildə zəifləyib. İxrac cəmi 2.5% artıb ki, bu da son altı ayın ən aşağı göstəricisidir.
Yanvar və fevral aylarında isə ixrac 20%-dən çox artmışdı. Bu artım əsasən elektronika və istehsal məhsullarına olan yüksək tələbatdan qaynaqlanırdı.
Mart ayında idxal isə təxminən 28% artıb. Bu isə aylıq ticarət balansını (ixrac-idxal fərqi) 50 milyard dollardan bir qədər çox səviyyəyə endirib — bu da bir ildən çox müddətdə ən aşağı göstəricidir.
Ekspertlərə görə, idxalın bu qədər artmasının səbəbi İran müharibəsi nəticəsində qlobal qiymətlərin yüksəlməsidir.
İranın Hörmüz boğazından keçən gəmilərə təhdidləri neft və ondan hazırlanan məhsulların qiymətini artırıb.
Çin Körfəz neftindən digər Asiya ölkələrinə nisbətən az asılı olsa da, ölkədə yanacaq bahalaşıb və bəzi aviaşirkətlər uçuşları azaltmağa məcbur olub.
Ekspertlər bildirir ki, müharibə səbəbindən dünya üzrə qiymətlər artdıqca, istehlak azalacaq və bu da Çinin ixracına mənfi təsir göstərə bilər.
Mənbə: BBC
Hazırladı: Ziyalə Əhmədli
Gundelik.az
