Çərşənbə axşamı Qərbi Avropanın əsas fond indeksləri korporativ xəbərlər və iqtisadi statistikaların təsiri ilə artım nümayiş etdirib.
Gundelik.az-ın məlumatına görə, Avropanın ən iri şirkətlərini birləşdirən Stoxx Europe 600 indeksi 0,28% artaraq 554,95 bəndə yüksəlib. Almaniyanın DAX indeksi 0,36%, Fransanın CAC 40-ı 0,54%, İtaliyanın FTSE MIB-i 0,13%, İspaniyanın IBEX 35-i isə 0,5% dəyər qazanıb. Böyük Britaniyanın FTSE 100 indeksi isə 0,04% geriləyib.
Avrozonada PMI göstəriciləri də açıqlanıb. HCOB və S&P Global məlumatına görə, satınalma menecerləri indeksi avqustda 51 bənddən sentyabrda son 16 ayın maksimumu olan 51,2 bəndə yüksəlib. Xidmət sektoru 50,5-dən 51,4 bəndə artıb, sənaye PMI isə 50,7-dən 49,5 bəndə enib. Almaniyada kompozit PMI 52,4 bəndlə 2024-cü ilin mayından bəri ən yüksək səviyyəyə çatıb. Fransada isə göstəricilər zəifləyib – kompozit PMI 48,4, sənaye PMI 48,1, xidmət sektoru isə 48,9 bənd təşkil edib. Böyük Britaniyada kompozit PMI 53,5-dən 51 bəndə düşüb.
Şirkət xəbərlərinə gəlincə, Stoxx Europe 600 indeksində ən böyük artımı Böyük Britaniyanın ev malları pərakəndə satış şəbəkəsi Kingfisher Plc nümayiş etdirib (+14,6%). Ən kəskin ucuzlaşma isə İtaliyanın Mediobanca səhmlərində qeydə alınıb (-5,9%). Bunun səbəbi rəqib Monte dei Paschi di Siena-nın səhmdarlarla yeni razılaşma əldə etməsi olub. Monte dei Paschi-nin bazar kapitallaşması isə 0,5% artıb.
Danimarkanın enerji şirkəti Orsted məhkəmə qərarı ilə ABŞ-da “Revolution Wind” külək stansiyasının tikintisinə icazə alaraq səhmlərinin 4% bahalaşmasına nail olub. Hollandiya ASM International şirkəti illik proqnozunu aşağı saldığı üçün səhmləri 0,1% dəyər itirib. Heineken isə Kosta Rikada içki və pərakəndə aktivlərini 3,2 milyard dollara alacağı xəbəri fonunda 0,7% bahalaşıb.
Almaniya bazarında adidas səhmləri 3,5% artımla liderlik edib. Volkswagen (+3,1%), Porsche (+2,5%), Infineon (+2,4%) və Mercedes (+2,3%) də müsbət nəticə göstərib. Əksinə, Henkel (-2,6%), Commerzbank (-1,9%) və Deutsche Boerse (-1,7%) geriləyib.
Parisdə lüks mal istehsalçıları L’Oreal (+3,5%), LVMH (+3,2%) və Kering (+1,9%) yüksəlişlə diqqət çəkib. Əczaçılıq nəhəngi Sanofi isə 1,2% dəyər itirib.
Gundelik.az
